Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, սոցիալական ծրագրերի շրջանակներում, հունվարի 21-ին աջակից եղավ Մկրտչյան բազմանդամ կարիքավոր ընտանիքին: Եկեղեցու հոգևոր հովիվ Տեր Գրիգոր քահանա Գրիգորյանը Մկրտչյան Լիդիային (61 տ.) հանձնեց մոսկվաբնակ Բաղդասարյան ընտանիքի կողմից տրամադրված դրամական աջակցություն՝ 100 ԱՄՆ դոլար:
Տասը անդամներից բաղկացած կարիքավոր ընտանիքը բնակվում է Շիրազի փողոցի 30/8 հասցեում: Տիկին Լիդիան երկու դուստր ունի և մեկ որդի: 22-ամյա որդին տառապում է աուտիզմով: Դուստրերից մեկն ընտանիք է կազմել և իր ամուսնու ու երկու զավակների հետ բնակվում է հայրական տանը՝ բնակարան չունենալու պատճառով: Մշտապես զբաղված լինելով տղայի խնամքով՝ տիկին Լիդիան չի կարողացել աշխատել: «Մեր ընտանիքում միայն ամուսինս և աղջիկս են աշխատում, փեսաս աշխատանք է փնտրում, իսկ տղայիս հաշմանդամության, մորս և սկեսուրիս թոշակների գումարներով փորձում ենք մեր ընտանիքի նվազագույն կարիքները հոգալ: Շնորհակալ եմ Զորավոր Ս. Աստվածածին եկեղեցու համայնքից, որ իր գործունեությամբ օգնում և աջակցում է մեզ նման կարիքավոր ընտանիքներին»,- ասաց տիկին Լիդիան:
Յուրաքանչյուր առաքինություն ծնում է զոհաբերություն: Բարձրագույն առաքինությունը՝ սերը, ծնում է կատարյալ անձնազոհություն, ինչն էլ դեպի հավիտենական կյանք տանող կարևորագույն ուղին է: Սերը զոհաբերում է իրեն, և զոհաբերությունը սիրո համար միայն պարգև է և ոչ կորուստ:
«Ամենամեծ ուրախությունը, Աստծուն միավորվելով, մերձավորին ծառայելն է: Ամենամեծ վիշտը ծառայելն է ինքդ քեզ և եսասիրությանդ հետ մահանալը»,- ասել է վանական Սիմեոն Աթոսացին:
Կարինե Սուգիկյան
Զորավոր Սուրբ Աստվածածին եկեղեցի