Քրիստոնեական առաքինությունների գագաթը համարվող սերը լիացնում է և հարստացնում, նրա առկայությամբ ամեն ինչ փոխադարձաբար լրացվում է: Երբ մարդն ատում է, խլում է իրենից ինչ-որ մի բան, իսկ երբ սիրում է, հարստանում է նրանով, ում սիրում է: Աստված, Ով ունի կատարյալ սեր, հարուստ է: Եկեղեցու հայրերը միաձայն են այն հարցում, թե նա, ով միայն իր մասին է հոգ տանում, անտեսելով իր նմանին, կհայտնվի ավետարանական անպտուղ թզենու վիճակում (Մատթեոս 21:19): Երբ աստվածային սիրո շուրջ մեծ թվով մարդիկ են համախմբվում, ապա թզենիները սկսում են պտղաբերել, ապա և մեծանում է հարստացողների թիվը: Սիրո օրենքն որդեգրած Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, սոցիալական ծրագրերի շրջանակներում, շարունակում է հարստացնել իր կյանքը:
Մարտի 8-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանն Ալեքսանյան Լիլիթին (31 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Լիլիթն իր երկու անչափահաս աղջիկների հետ վարձակալությամբ է բնակվում Չարբախի 4-րդ փողոցի 29 բնակարանում: Հինգ տարի է, ինչ Լիլիթի ամուսինը կալանավորված է և ընտանիքի ողջ հոգսը նրա ուսերին է: Լիլիթը մշտական աշխատանք չունի, իսկ ընտանեկան նպաստով կարողանում է միայն տան վարձը վճարել: Ընտանիքի մայրը նշեց, որ այս տարիների ընթացքում շատերին է դիմել օգնության խնդրանքով, իսկ արձագանքել է և աջակցել միայն Հայ Առաքելական Սուրբ եկեղեցին: Լիլիթն անչափ շնորհակալ էր Զորավոր Ս. Աստվածածին եկեղեցուց, հոգևոր հովվից և աջակից անձից:
Կարինե Սուգիկյան
Զորավոր Սուրբ Աստվածածին եկեղեցի