Գրքեր

«Արդարների ճանապարհները նման են ծագող լույսի»

Լուսավոր հավատքն չի կարող արտահայտվել այլ կերպ, քան կյանքով ու գործով: Լուսավոր ու գործուն հավատք ունեցողը գործում է ի փառս Աստծո և հօգուտ մերձավորի՝ դառնալով այն լույսը, որի մասին Տերն ասաց. «Թող ձեր լույսը շողա մարդկանց առջև, որպեսզի նրանք տեսնեն ձեր բարի գործերը և փառավորեն ձեր Հորը, որ երկնքում է» (Մատթ. 5:16): Լուսավոր հավատք ունեցողը մեծ պատասխանատվությամբ է մոտենում այն առաքելությանը, որին կոչվել է ի վերուստ: Զորավոր Ս. Աստվածածին եկեղեցին և «Արև-երեխաներ» ՀԿ-ն՝ իրենց կոչմանը հավատարիմ, հավատավոր և բարեպաշտ հայորդիների աջակցությամբ, սոցիալական ծրագրերի շրջանակում, շարունակում են աջակցել այն ընտանիքներին, ուր մեծանում են Դաունի համախտանիշ ունեցող արև երեխաները: Ապրիլի 5-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը, Դյագունց Շուշանիկին (28 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Գորիսի շրջանի Տեղ գյուղում է բնակվում Դավիթյան ընտանիքը, ուր մեծանում է արև Սեյրանը (2տ.): Սեյրանի մայրը՝ Շուշանիկը նշեց, որ ամուսինը մշտական աշխատանք չունի և իրենք դժվարությամբ են կարողանում հոգալ իրենց ու երեք զավակների անհրաժեշտ կարիքները: «Սեյրանը շատ թույլ է, մենք չենք կարողանում երեխային հաճախակի Երևան բերել՝ վերականգնողական բուժումների: Հուսով ենք, որ Գորիսի շրջանում վերականգնողական կենտրոն կբացվի, ուր հնարավորություն կունենանք հաճախելու: Մեզ ընտանեկան նպաստ չեն տրամադրում՝ պատճառաբանելով, որ միայնակ չենք ապրում, այլ՝ սկեսուրիս, սկեսրայրիս և տեգրոջս ընտանիքի հետ»,- ասաց Շուշանիկը՝ իր երախտագիտությունը հայտնելով աջակից անձին և Զորավոր Ս. Աստվածածին եկեղեցուն ու «Արև-երեխաներ» ՀԿ-ին:

Որևէ մեկի բարի պահվածքը, դաստիարակությունը խորհել է տալիս այն բարի դաստիարակության մասին, որ ստացել է նա իր ծնողներից: Քրիստոնյան ևս երբ փորձում է աստվածային պատվիրանների համաձայն ապրել, ապա մարդիկ, տեսնելով նրա աստվածահաճո կյանքը, փառաբանում են Աստծուն, իսկ հակառակը տեսնելով՝ գայթակղվում են և Աստծո դեմ խոսում: «Արդարների ճանապարհները նման են ծագող լույսի, որ առաջնորդում և լուսավորում է նրանց, մինչև որ օրը լրիվ լուսավորի: Ամբարիշտների ճանապարհները նման են խավարի, և նրանք չգիտեն, թե ինչպես պիտի սայթաքեն» (Առակ. 4:18-19):

 

Կարինե Սուգիկյան

05.04.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․