Այգեպարցիները հյուրընկալվեցին Արարատյան Հայրապետական թեմում

Դեկտեմբերի 12-ին ԱՀԹ առաջնորդական փոխանորդ գերաշնորհ Տ.Նավասարդ արքեպիսկոպոսի օրհնությամբ և թեմի երիտասարդաց միությունների հոգևոր պատասխանատու Տ.Պետրոս ավագ քահանա Մալյանի համակարգմամբ թեմի երիտասարդները հյուրընկալեցին Այգեպարի դպրոցի 20 աշակերտներին: Նրանք եկել  էին Տավուշի թեմի Բերդի տարածաշրջանի  հոգևոր հովիվ Տ.Արամ քահանա Միրզոյանի գլխավորությամբ:

Առաջնորդարանի դահլիճում հյուրերին ողջունեցին Տ. Պետրոս ավագ քահանա Մալյանը, թեմի բարոգործական բաժնի պատասխանատու Շուշան Պետրոսյանը: Կազմակերպված միջոցառման ժամանակ ելույթ ունեցան ԱՀԹ «Մանկունք» երգչախումբը, Հ.Թումանյանի հեքիաթների բեմադրությամբ հանդես եկան Մայր Աթոռ Սուրբ Էջմիածնի և ՀԲԸՄ Մալաթիայի հայորդաց տան «Հումորիկ» թատրոնի սաները: Այգեպարցի երեխաները ասմունքեցին:

Հյուրերին Տ. Նավասարդ սրբազանի օրհնությունները փոխանցեց Տ. Պետրոսը: Ապա շնորհակալության խոսքեր ասաց Տ. Արամը՝ պատմելով, թե ինչպես Այգեպարի համար դժվար օրերին Արարատյան Հայրապետական թեմն օգնության ձեռք մեկնեցին իրենց: «Այսօր մենք ուխտի ենք եկել Մայր Աթոռ, մեր ուխտը նորոգեցինք Մայր Տաճարում ու չէինք կարող չհանդիպել թեմի երիտասարդներին: Խնդրում եմ մեր շնորհակալությունները փոխանցեք նաև Նավասարդ Սրբազանին»,- ասաց տեր հայրը:   

Թեմի բարեգործական բաժինը տոնական փաթեթներ ու նվերներ էր պատրաստել Այգեպարի դպրոցականների համար: Նվերներ ստացան նաև «Մանկունքի» ու «Հումորիկի» սաները:

Այգեպարցիների հետ սա երկրորդ հանդիպումն էր: Ամիսներ առաջ ս. Աստվածամոր ծննդյան տոնին՝ սեպտեբերի 8-ին, Արարատյան Հայրապետական թեմի մի խումբ երիտասարդներ ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի օրհնությամբ և ԱՀԹ երիտասարդաց միությունների հոգևոր պատասխանատու Տ.Պետրոս ավագ քահանա Մալյանի հետ մեկնեցին սահմանամերձ Այգեպար գյուղ: Այցի նպատակը «Մենք մեր զինվորի կողքին ենք»  ծրագրով իրականացրած «Նամակ զինվորին» և «Օգնություն այգեպարցիներին»  նախաձեռնությունների շրջանակում հավաքված նամակներն ու առաջին անհրաժեշտության իրեր թշնամու գնդակից այրված տների բնակիչներին հասցնելն էր: Նրանք նաև այցելել էին գյուղի դպրոց ու մանկապարտեզ:

Այժմ երիտասարդներն այդ դպրոցի սաների հետ հանդիպումը կազմակերպել էին սեփական հարկի տակ:

Արարատյան Հայրապետական թեմի տեղեկատվական բաժին