20 Մայիս, Գշ, Հինանց ԼԱ օր
«Բանտի մէջ էի եւ այցելեցիք ինծի» (Մտ․ 25.36)։ Ի՞նչ են այն բանտերը որոնց մէջ անհամար թիւով մարդիկ կ՚ապրին։
Այս բոլորին մէջ ամենավատը այն է, որ յուսահատ մարդը կը կորսնցնէ նաեւ վերականգնելու եւ Աստուծոյ դառնալու ամէն իղձ եւ տրամադրութիւն, ինչպէս եղաւ պարագան Յուդայի եւ Երուսաղէմի բնակիչներուն (Եր․ 18.12)։ Աստուածատուր մեր կոչումն է այցելել յուսահատութեան բանտը ինկած մարդիկը եւ յոյսով գօտեպնդել զանոնք եւ յիշեցնել անոնց որ «յոյսը երբեք ամօթով չի ձգեր» (Հռ․ 5.5)։
3. Մահուան բանտը։ Մահէն վախցող մարդիկը կարելի է բաժնել երկու խումբի.- (1) Մահէն կը վախնան անոնք՝ որոնք Քրիստոսի արիւնով իրենց մեղքերուն համար թողութիւն չեն գտած եւ (2) անոնք՝ որոնք չունին մահուան ճշգրիտ իմացութիւնը։ ԶԱստուած եւ մահը չճանչցողը բնականօրէն կը վախնայ անոնցմէ։ Անորոշ եւ մթին բաները միշտ կը մտահոգեն մարդ արարածը։
Քրիստոսով Աստուծոյ հետ հաշտուածներուս պաշտօնն է՝ «որ այս հաշտութիւնը պատգամենք բոլոր մարդոց» (Հռ․ 5.19) եւ յիշեցնենք անոնց, որ հաւատացեալ մարդը պէտք չունի վախնալու մահէն, որովհետեւ երբ ան իր աչքերը փակէ երկրի վրայ՝ ինքզինք իսկոյն կը գտնէ Քրիստոսի ներկայութեան մէջ, յաւիտենապէս ապահով։ Այս իմաստով, բանտին մէջ եղողներուն այցելել, կը նշանակէ օգնութեան ձեռք երկարել մեր բոլոր եղբայրներուն եւ քոյրերուն եւ ազատագրել զանոնք մեղքի ու մահուան բանտէն, վախի եւ կասկածամտութեան բանտէն, յաւիտենական դատապարտութեան եւ կորստեան բանտէն։ Սիրելի՛ ընթերցող, անհաշիւ է թիւը իրական բանտարկեալներուն եւ հոգեւոր իմաստով բանտարկեալներուն։ Իբրեւ Ազատարարին զաւակը, քու կոչումդ է ճշմարիտ ազատութեան փողը հնչեցնող զինուոր մը ըլլալ։ Մարդիկ պէ՛տք ունին նման Քրիստոսաւէտ զինուորներու։
Վաղինակ վրդ. Մելոյեան
«Ե՛ս եմ ճամբան, ճշմարտութիւնը եւ կեանքը» գրքից
Զորավոր Սուրբ Աստվածածին եկեղեցի