22 Դեկտեմբեր, Հիսնակի Ե Կիրակի
Փետրվարի 14-ին՝ Տեառնընդառաջի տոնի օրը, Տ. Շևչենկոյի անվան թիվ 42 ավագ դպրոցում սիրո մեծ տոնախմբություն էր: Դպրոցի աշակերտները մեծ սիրով և խանդավառությամբ էին պատրաստվել Ս. Սարգսի և Տեառնընդառաջի տոներին: Մինչ տոնախմբությունը դպրոցի մուտքի առջև տասներկու դասարաններից տասներկու աշակերտներ իրենց կանթեղները լուսավորեցին Զորավոր Ս. Աստվածածին եկեղեցուց բերված կրակի լույսով, որ աշակերտներին փոխանցեց Տեր Վահան քահանա Առաքելյանը: Միջոցառումը մեկնարկեց Տերունական աղոթքով: Բացման խոսքով հանդես եկավ դպրոցի տնօրեն Էլեոնորա Թումանյանը, ով ողջունեց ներկաներին՝ նշելով, որ դեռ վաղ առավոտից իրենց դպրոցում թևածում էր սերը: Աշակերտները մանրամասնորեն ներկայացրեցին Ս. Սարգսի և Տեառնընդառաջի տոների պատմություններն ու ժողովրդական ավանդույթները ՝ անդրադարձ կատարելով նաև հասարակության մեջ ինչ-որ չափով տարածում գտած օտարամոլ տոնին՝ Վալենտինին: Ազգային պարերով ամփոփվեց տոնախմբության առաջին մասը, իսկ երկրորդ հատվածում տասներկու դասարաններն անհամբերությամբ սպասում էին, թե ինչ գնահատանք էին ստանալու իրենց կողմից պատրաստված սեղանները, որ զարդարված էին ազգային ավանդական քաղցրեղենով, ուտեստներով և տոների խորհրդանիշներով: Տիկին Թումանյանը և Տեր Վահանը մեկ առ մեկ դիտեցին սեղանները և լսեցին աշակերտների կողմից ներկայացված մեկնաբանություններն ուտեստների և ձևավորումների վերաբերյալ:
Տեր Վահանը շնորհավորեց ներկաներին տոների կապակցությամբ և նրանց փոխանցեց ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությունը: Ապա դիմելով աշակերտներին՝ ասաց. «Սիրելի՛ աշակերտներ, այսօր ականատես եղանք նրան, թե ինչպիսի մեծ սեր ունեք հոգևոր և ազգային արժեքների նկատմամբ: Գնահատելի են բոլորիդ աշխատանքները, քանի որ սիրով էին պատրաստված: Իսկ տոները, որոնց այսօր դուք անդրադարձաք, սերտ առնչվում են աստվածային սիրո հետ: Այդ սիրո արդյունքում Աստված խոնարհվեց Իր աստվածային բարձունքից և եկավ դեպի մարդը, որպեսզի նա կորստյան չմատնվի, առաջնորդվի խաղաղության ճանապարհով և հավիտենական կյանքի պատիվն ու երջանկությունն ունենա: Սիրո շնորհիվ է, որ ընդառաջ ենք գնում Տիրոջը: Ուստի, աստվածային սերն ամուր պահեք ձեր հոգում և կյանքում՝ Հայ Առաքելական Սուրբ եկեղեցու ճշմարիտ հետևորդը լինելով»:
Տոնախմբությունն ավարտվեց Տեառնընդառաջի ավանդական խարույկի շուրջ:
Կարինե Սուգիկյան
Զորավոր Սուրբ Աստվածածին եկեղեցի