22 Դեկտեմբեր, Հիսնակի Ե Կիրակի
Հովհաննես Թումանյանի թանգարանի աշխատակազմի համար մարտի 28-ի աշխատանքային օրն սկսվեց մյուս օրերից տարբեր. աշխատակիցներն աշխատանքի էին ներկայացել աշխատանքային ժամից մեկ ժամ առաջ: Պատճառը պահքի վերաբերյալ այն հանդիպում-զրույցն էր, որ կազմակերպվել էր՝ ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և Զորավոր Ս. Աստվածածին եկեղեցու հոգևոր դասի նախաձեռնությամբ: Թանգարանի աշխատակիցների հետ հանդիպեցին և պահքի վերաբերյալ զրուցեցին Զորավոր Ս. Աստվածածին եկեղեցու խորհրդակատարներ Տեր Հայկազուն քահանա Մկրտչյանը և Տեր Վահան քահանա Առաքելյանը: Հանդիպում-զրույցն սկսվեց Տերունական աղոթքով, այնուհետև Տեր Հայկազունը ներկաներին փոխանցեց Նավասարդ Սրբազանի օրհնությունը:
Ինչո՞ւ է Հայ եկեղեցին տարվա կեսը պահքի օրեր սահմանել և ինչո՞ւ է անհրաժեշտ պահք պահել, այս հարցերին անդրադառնալով, Տեր Հայկազունը մասնավորաբար նշեց. «Սուրբ Գրքում կարդում ենք՝ ո՞վ է այն մարդը, որ ապրում է և չի մեղանչում, Աստծո պատկերով և նմանությամբ ստեղծված մարդը զրկվեց Աստծո ներկայությունից, քանի որ խախտեց Աստծո կողմից իրեն տրված առաջին պատգամը, որ վերաբերում էր պահեցողությանը: Աստվածային սերը պատվիրազանց մարդու հանդեպ տարածվեց Աստվածորդու մարդացմամբ»: Տեր Հայրն ընդգծեց այն կարևոր հանգամանքը, որ մկրտությամբ ադամական մեղքից մաքրված անձը հետագայում իր գործած մեղքերից կարող է ազատվել միայն զղջմամբ, խոստովանությամբ և ապաշխարությամբ: Իսկ ժամանակավոր կյանքում հոգևոր վերանորոգությանն ուղղված պահքի օրերը միջոց են նախապատրաստվելու հավիտենական երանելի կյանքին:
Մեծ պահքի կիրակիների ոսկե շղթային անդրադարձավ Տեր Վահանը՝ մանրամասնելով մարդկության փրկագործությունն ընդգծող շղթայի յուրաքանչյուր օղակի՝ կիրակիի խորհուրդը: «Հաճախ մարդը մոռանում է, որ ինքը բացի մարմնից, նաև հոգի ունի, ինչն էլ մեծ արգելք է հանդիսանում հոգևոր առաջընթացի համար: Մարմնի խնամքին զուգահեռ անհրաժեշտ է նաև հոգին խնամել, քանի որ միայն նման կերպով կարելի է հասնել հոգևոր ներդաշնակության: Յուրաքանչյուր անհատ, մեծ արժեք ունենալով Տիրոջ առջև, իր անելիքն ունի այս կյանքում: Մեր Տերն Իր սիրով ցրեց աշխարհի անհավատության խավարը՝ առաջնորդելով մարդուն դեպի հավիտենություն: Ուստի մենք էլ, ապաշխարության ընթացքին, Քրիստոսի նմանողությամբ ինքներս մեզ հայտարարենք, թե՝ հաղթեցինք աշխարհին»,- նշեց Տեր Վահանը:
Զրույցի ավարտին աշխատակիցների հարցերին պատասխանեցին հոգևորականները, ներկաների համար կարևոր էր իմանալ, թե ո՞ր երևույթներն ու արարքներն են Տիրոջ կողմից մեղք համարվում և որոնց համար էլ մարդը պետք է ապաշխարի: «Հոգևոր կյանքին վերաբերող մի շարք հարցերի շուրջ խորհելու առիթ ունեցանք, խաղաղվեցինք»,- արտահայտվում էին աշխատակիցները:
Հանդիպման ավարտին թանգարանի տնօրեն Նարինե Թուխիկյանը և աշխատակիցները շնորհակալություն հայտնեցին Զորավոր Ս. Աստվածածին եկեղեցու հոգևոր դասին՝ նման հոգեշահ հանդիպում կազմակերպելու համար:
Հովհաննես Թումայանի թանգարանում աշխատանքային օրն արդեն սկսված էր, և թանգարան ոտք դրած դպրոցականները, մինչ կծանոթանային մեծանուն գրողի մասին պատմող բացառիկ արժեքներին, ստացան արժանապատիվ քահանաների օրհնությունը:
Կարինե Սուգիկյան
Զորավոր Սուրբ Աստվածածին եկեղեցի