«Մարդ ինչ սերմանում է, այն էլ կհնձի»

Ամանորի նախաշեմին քրիստոնյան փորձում է արժանավայել պատրաստվել Ս. Ծննդյան տոնին՝ անցնելով յուրահատուկ նախապատրաստության մի շրջան՝ Ս. Ծննդյան պահքը, որը կարևոր է իմաստավորել նաև ողորմածությամբ: Ս. Ներսես Շնորհալի հայրապետը հորդորում է. «Ուստի աղաչում եմ՝ եթե անգամ շատ ուտելիք և ըմպելիք ունենաք ձեր ձեռքում և տանը, ձեր հոգիները խնայելով՝ ագահությամբ և որկրամոլությամբ մի՛ վարվեք դրանց հետ, այլ…. պարկեշտությամբ և օրինավոր կերպով: Եվ ինչ ձեզանից նվազեցնում եք ըստ Աստծո պատվիրանի՝ ի սեր կարոտյալ և չքավոր եղբայրների, ծերերի և տկարների, նրա՛նց տվեք և ձեր հոգիների համար կրկնակի բարիք կամբարեք»:

Հայ եկեղեցում սովորություն կա նաև ննջեցյալների անունից ողորմություն տալ կարիքավոր մարդկանց: Այդ սովորույթի համաձայն՝ Զորավոր Ս. Աստվածածին եկեղեցու համայնքի անդամներից մեկը, ով չցանկացավ իր անունը նշել, ի հիշատակ իր հանգուցյալ ծնողների՝ Ֆրանկյան Հայկի և Կարապետյան Ֆենյայի, տրամադրեց դրամական օգնություն (100 ԱՄն դոլար), որը եկեղեցու հոգևոր հովիվ Տեր Գրիգոր քահանա Գրիգորյանը դեկտեմբերի 30-ին հանձնեց Աղանյան ընտանիքին: Երկու հոգուց բաղկացած կարիքավոր ընտանիքը վարձակալությամբ բնակվում է Շրջանային 2/14 հասցեում գտնվող մեկ սենյանականոց բնակարանում: Անահիտ Աղանյանը (43 տ.) երկու զավակ ունի, դուստրն ամուսնացել է, այժմ նա միայնակ է խնամում 6-ամյա որդուն՝ Համլետ Վանյանին: Աղանյան ընտանիքը կարիքի մեջ է հայտնվել, քանի որ ընտանիքի մայրն առողջական խնդրի՝ կրծքագեղձում նորագոյացություններ ունենալու պատճառով, ի վիճակի չէ աշխատելու: «Ըստ բուժստուգումների՝ նորագոյացությունները մեծանում են և անհապաղ վիրահատության անհրաժեշտություն կա, ինչը հետաձգվում է ֆինանսական խնդիրներիս պատճառով»,- ասաց Անահիտը: Ընտանիքի հետ զրույցից հետո, Տեր Գրիգորը բժշկության աղոթք կարդաց: Անահիտը զգացված էր այն ուշադրության և հոգատարության համար, որ Զորավոր Ս. Աստվածածին եկեղեցու համայնքն արդեն երկրորդ անգամ ցուցաբերեց իր ընտանիքի հանդեպ:

Բոլորիս հայտնի է աստվածաշնչյան հետևյալ համարը. «Մարդ ինչ սերմանում է, այն էլ կհնձի» (Գաղատացիներ 6:8), և ի՞նչ պետք է հնձի այն մարդը, որ ոչինչ չի սերմանել: Այսինքն՝ քրիստոնյայի առաքելությունը ոչ թե միայն չարը չգործելն է, այլ՝ հավատը կենդանի պահելը բարի գործերով (Հակոբոս 2:26):

Կարինե Սուգիկյան