Գրքեր

Փառաբանության երկու վիճակ

Փառաբանությունը հասկանալու համար պետք է իմանալ, որ այդ ոլորտում երկու վիճակ կա: Եթե մարդ չանցնի առաջինի միջով, չի կարող հասնել երկրորդին: Առաջինում մարդը վշտերի մեջ է, բայց ամեն ինչ ճիշտ է ընկալում: Հետևում է բարի խորհուրդներին, իրեն է մեղադրում, խոնարհվում է, զղջում և շնորհակալություն հայտնում Աստծուն ամեն ինչի համար. «Տե՛ր Աստված,- ասում է,- երախտապարտ եմ Քեզ, իմ մեղքերի համար եմ այս ամենը տանում: Ես արժանի եմ ավելի վատին, բայց վախենում եմ չդիմանամ: Խնդրում եմ Քեզ, համբերություն և ուժ տուր ինձ, որպեսզի դիմանամ ամեն ինչին»: Այնժամ գալիս է աստվածային մխիթարությունը, և մարդ անցնում է երկրորդ վիճակին:

Այս վիճակում գտնվում են այն մարդիկ, ովքեր անցել են ապաշխարության շրջանը և զգացել աստվածային մխիթարությունը, որը գալիս է մեղքերի թողության ժամանակ, այսինքն՝ անցել է ուրախաբեր լացի միջով և հասել փառաբանության: Այդ ժամանակ մարդ դառնություններ չունի, նա սրբազան ուրախություն է զգում, Աստծու հանդեպ երախտագիտություն, որին չի կարողանում դիմանալ: Անընդհատ կրկնոմ է «փա՜ռք Քեզ, Տե՛ր», շնորհակալություն է հայտնում Աստծուն Նրա մեծ բարիքների համար, Նրա մեծ սիրո համար, և ապա հոգին արդեն ինքն է մղվում աղոթելու, Աստծուն փառաբանելու կամ ներողություն է խնդրում Աստծուց, որ անարժան է Նրա օրհնություններին:

- Իսկ հայր Տիխոնն ինչպե՞ս էր աղոթում, հա՛յր:

- Հայր Տիխոնը հասել էր փառաբանության ոլորտին և աղոթքի փոխարեն փառաբանություն ուներ: Նրա շուրթերից միայն լսվում էր. «Փա՜ռք Քեզ, Տե՛ր Աստված, փա՜ռք Քեզ»,- և տարվա համարյա բոլոր օրերը նրա համար «լուսավոր» էին, որովհետև նա մշտապես ապրում էր զատկական ուրախության մեջ:

Նման վիճակում գտնվող մարդկանց համար միշտ Զատիկ է, Հարություն: Բոլոր զանգերն ու կոչնակները խնդությամբ ղողանջում են: «Օրհնեցե՛ք նրան ցնծությամբ, գովաբանեցե՛ք նրան ուրախությամբ» (Սղմ. 150:4): Նրանք ողջ օրը փառաբանում են Աստծուն, և նրանց սրտի զարկը ասես զանգի ղողանջ լինի:

 

Պաիսիոս Աթոսացի

Ռուսերենից թարգմանեց Էմիլիա Ապիցարյանը

 

15.09.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․