Դարեր ի վեր, այսօր էլ քրիստոնեական եկեղեցին՝ որպես համայնք, ապրում է և գործում: Թեև կան մարդիկ, որ եկեղեցին նույնացնում են հոգևորականության հետ, այնինչ եկեղեցին նաև այն ժողովուրդն է՝ համայնքը, որ, հաճախելով եկեղեցի, մասնակից է դառնում եկեղեցական կյանքին: Երջանկահիշատակ Գարեգին Ա կաթողիկոսը քրիստոնեութունը նախ և առաջ եկեղեցական համայնքային կյանք է համարում, ըստ Վեհափառ Հայրապետի՝ եկեղեցին համայնք է և քրիստոնեական հավատքը համայնքային ձևով կարելի է ապրել:
Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, ակտիվ գործունեություն է ծավալում սոցիալական ծրագրերի շրջանակներում: Թե՛ համայնքի անդամները, և թե՛ արտերկրում բնակվող հավատավոր հայորդիները ջանասիրաբար կյանքի են կոչում Տիրոջ այն պատգամը, որ հորդորում է. «Սիրիր քո ընկերոջը քո անձի պես» (Մատթ. 22:39):
Զորավոր Ս. Աստվածածին եկեղեցու համայնքի անդամ Անդրանիկ Բաբոյանի համար ավանդույթ է դարձել ամեն տարի՝ Ս. Ծննդյան տոնին ընդառաջ, իր աջակցությունը բերել սոցիալական ծրագրին՝ տրամադրելով սննդամթերք: Այս տարի 365 000 դրամի արժողությամբ սննդամթերքը՝ ալյուր, մակարոնեղեն և շաքարավազ, բաշխվեց եկեղեցու աշխատակիցներին, համայնքի կարիքավոր անդամներին և սիրիահայ ընտանիքներին:
«Սերը այն միակ ուժն է, որ տրվելով չի սպառվում, այլ ավելանում է: Այն նվերները, որ մենք ենք նվիրում՝ ժամանակ, տաղանդ, ձիրք, ուժ, դրամ, նյութական հարստություններ, այսպիսով շաղախվում են մեր ինքնության հետ: Այս դեպքում մենք անձնապես հրճվում ենք, որովհետև անձնապես մասնակից ենք դառնում Աստծո կողմից մեզ տրվածին՝ տալով մեր եղբայրներին և նմանակիցներին, մեր՝ հայերիս պարագայում՝ մեր ազգին, մեր եկեղեցուն, մեր դպրոցին, մեր մշակույթին, մեկ խոսքով, մեր անհատական գոյությունից վեր՝ մեր հասարակաց համայնությանը և ընդհանրական ու անանց արժեքներին»,- ասել է երջանկահիշատակ Գարեգին Ա կաթողիկոսը:
Կարինե Սուգիկյան
Զորավոր Սուրբ Աստվածածին եկեղեցի