23 Դեկտեմբեր, Բշ
Հոկտեմբերի 29-ին «Մենք մեր զինվորի կողքին ենք» ծրագրի շրջանակում ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանն այցելեց ՀՀ ԶՈՒ ծառայող Սարգիս Ստեփանյանի ընտանիքին: Վերջինս օրեր առաջ ՀՀ ՊՆ նախարար Սեյրան Օհանյանի դիմումով Երևանի քաղաքապետարանի կողմից բնակարան է ստացել:
Սրբազան հայրն Սարգիս Ստեփանյանի նոր բնակարանում կատարեց Տնօրհնեքի կարգ: Նախկինում Ստեփանյանների ընտանիքն ապրում էր ծառայողական բնակարանում: Բացի «Մենք մեր զինվորի կողքին ենք» ծրագրով նախատեսված գումարից Սարգիսենց ընտանիքը նվեր ստացավ նաև կենցաղային տեխնիկա:
Շնորհավորելով Ստեփանյանների ընտանիքին նորամուտի առթիվ՝ Սրբազան հայրն ի մասնավորի ասաց. «Օրհնությամբ թող լինի ձեր նորամուտն այս օջախը: Մեզ համար այս արարողությունը կարևոր խորհուրդ ունի: Ձեր առողջությունը հայրենիքի ծառայությանը զոհաբերելով ՝ ձեր հոգին պահեցիք պայծառ՝ պատրաստակամորեն ծառայելով վասն հավատո և վասն հայրենյաց: Դուք կենդանի օրինակ և ներշնչանքի աղբյուր եք այն երիտասարդների համար, ովքեր զորակոչման ենթակա են կամ այս պահին ծառայում են զինված ուժերում: Նրանց համար Ձեր օրինակն առավել քան խոսուն է՝ ընկնել, բայց չհանձնվել և միշտ կանգնել հաղթելու համար:
Թող Աստված օրհնի ձեր ծողներին, զավակներին և ձեր անսայթաք ընթացքն. ամեն»:
Սարգիս Ստեփանյանը 2014թ. հակառակորդի կողմից վիրավորված զինվորին չեզոք գոտուց դուրս հանելու հանձնարարությունը կատարելու ժամանակ վիրավորվել էր՝ կորցրնելով երկու ոտքն ու աջ ձեռքը: Սակայն այդ հանգամանքը նրան ետ չի պահել հայոց բանակում ծառայությունը շարունակելու մտքից: Այժմ մայոր Սարգիս Ստեփանյանը շարունակում է իր ծառայությունը բերել հայոց բանակին: Պարգևատրվել է ՀՀ ՊՆ Մարշալ Բաղրամյան մեդալով, Հայաստանի Հանրապետության և Լեռնային Ղարաբաղի Արիության համար մեդալներով:
Արարատյան Հայրապետական թեմիտեղեկատվական բաժին
Զորավոր Սուրբ Աստվածածին եկեղեցի