Զորավոր Սուրբ Աստվածածին եկեղեցու հոգևոր հովիվ Տեր Գրիգոր քհն. Գրիգորյանի Ավետման տոնի մաղթանքը

Սիրելի մայրեր և քույրեր,

Հայ Առաքելական Սուրբ Եկեղեցին այսօր նշում է Սուրբ Աստվածածնի ավետման սքանչելի տոնը, որը սկիզբն է համարվում քրիստոնեական մյուս տոների:

«Ողջույն քեզ, ով շնորհընկալ»,- այս խոսքերով ողջունեց Գաբրիել հրեշտակապետն ու աստվածային ավետումը բերեց Աստծո ընտրյալ, մաքրամաքուր, սուրբ Անոթին, գեղեցկագույն Ծաղկին, կանանց մեջ Ամենաերանելիին, Սուրբ Կույս Աստվածամայր Մարիամին: Այս առիթով էլ այսօր Հայաստան Աշխարհում նշվում է Մայրության և գեղեցկության օրը, որի առիթով էլ ջերմագին շնորհավորանքներս եմ բերում բոլոր մայրերին և քույրերին:

Սուրբ Աստվածամոր ավետումը սկիզբը հանդիսացավ աստվածային ամենակարողության այն հրաշքի, որին ականատես եղավ ողջ աշխարհը. Անարատ Կույսը մայրացավ և պահպանեց Իր կուսությունը, Աստված մարդացավ և պահպանեց Իր աստվածությունը: Սուրբ Կույսը մեծագույն խոնարհությամբ ընդունեց Աստծո կամքը, որ հայտնվեց հրեշտակապետի միջոցով և երկրային Իր կյանքի ողջ ընթացքով իմաստության, խոնարհության ու սիրասուն մոր օրինակը դարձավ աշխարհի բոլոր կանանց ու մայրերի համար:

Սիրելի մայրեր, մաղթում եմ ձեզ, որ Անաղարտ Աստվածամոր լուսապայծառ կերպարը ձեր սրտերում պահելով` այնպիսի զավակներ դաստիարակեք, որ աստվածային սերն ու ճշմարտության լույսը շողա նրանց հոգիներում ու միայն բարի պտուղներ բերի: Դաստիարակեք Հայոց Աշխարհին նվիրված ու արժանի զավակներ, Հայ Առաքելական Սուրբ եկեղեցու հավատարիմ հետևորդներ, քանզի պիտի լավ գիտենաք, որ այն ինչ սովորեցնում եք նրանց այսօր` վաղն, առաջին հերթին, հենց ձեզ են վերադարձնելու:

Մաքրամաքուր Ծաղիկ Մարիամի ավետմամբ Աստված իր մեծագույն սիրո լուրը տվեց մարդկանց: Ի դեմս Սուրբ Կույսի` Աստված գտավ վերջապես այն Անարատ Անոթը, որի միջոցով համայն մարդկության Փրկիչը ծնվեց:

Ես էլ մաղթում եմ, որպեսզի բոլոր նորաստեղծ ընտանիքներում և այն ընտանիքներում, ուր շատ փափագում ու իրենց անդադար աղոթքն են հղում առ Բարեգութ Երկնային Հայր` հնչի նորածնի լույս աշխարհ գալու այդքան սպասված ավետիսը: Թող Տիրամոր բարեխոսությունը հնչի բոլոր ապագա մայրերի համար և նրանք էլ արժանանան այդ սքանչելի բերկրանքին և մայր կոչվելու մեծագույն պատվին: Թող հայ մանուկներն, իրենց հեզ ու իմաստուն մայրերի տված խրատների շնորհիվ, Աստծո հավատքի մեջ մեծանան ու իրենց ընտանիքների և հասարակության զարդը դառնան:

Աղոթքս եմ բերում մեր բոլորի Ամենախնամ Մայր, Սուրբ Մարիամ Աստվածածնին, որ բարեխոս լինի Իր Միածին Որդու առջև բոլոր հայ օրիորդների, տիկնանց ու մայրերի համար` Աստծո օրհնությունն ու բարեշնորհությունը ստանալու և արժանի լինելու փառաբանելու Ամենասուրբ Երրորդությանը` Հորը, Որդուն և Սուրբ Հոգուն, այժմ, միշտ և հավիտյանս հավիտենից, ամեն:

Տեր Գրիգոր քհն, Գրիգորյան