23 Դեկտեմբեր, Բշ
Մայիսի 22-ին ԱՀԹ առաջնորդարանում գերաշնորհ Տ. Նավասարդ արքեպիսկոպոսի օրհնությամբ տեղի ունեցավ հանդիպում հոգեթերապևտ, բժշկական գիտությունների թեկնածու, նարեկաբուժ Արմեն Ներսիսյանի հետ: Քննարկան թեման նարեկաբուժությունն էր: Հանդիպումը կազմակերպվել էր «Արարատյան քննարկումներ» ծրագրի շրջանակում:
Զրույցը ԱՀԹ առաջնորդանիստ ս. Սարգիս եկեղեցու հոգևոր հովիվ Տ. Պետրոս ավագ քահանա Մալյանը սկսեց Տերունական աղոթքով, ապա ներկաներին փոխանցեց Սրբազան հոր բարեմաղթանքները:
Արմեն Ներսեսյանը, խոսելով «Մատեան ողբերգության» մասին, պատմեց, թե ինչպես է ս. Գրիգոր Նարեկացին կարողացել գտնել դեպի Աստված տանող ապաշխարության ճանապարհը և աղոթքամատյանը յուրաքանչյուր մարդու կարողանում է տանել այդ ուղով: Հաճախ այն բարդ է, սակայն սեփական հոգու խորքերը քննելու, սեփական մեղքերը գտնելու և ապաշխարելու ուղին է, որ մարդու ներսում փոփոխություններ է կատարում: Խոսելով տարբեր ծանր հիվանդություններից ապաքինված մարդկանց գրառումների մասին՝ նա ասաց, որ շատերը «շնորհակալություն են հայտնում իրենց հիվանդությանը, անգամ՝ ՄԻԱՎ- ՁԻԱՀ-ին, որի շնորհիվ նրանք կարողացան ճանաչել Աստծուն, վերափոխել սխալներով ու մեղքերով լի իրենց կյանքը»:
«Արարատյան քննարկումներ» ծրագիրը համատեղ իրականացնում են Արարատյան Հայրապետական թեմը և «Ծիրանի» մշակութային հանգոյցը 2014 փետրվարից:
Նախագծի ընթացքում կազմակերպվում են հանդիպումներ, քննարկումներ և սեմինար-դասախոսություններ տարբեր արվեստագետների, գիտնականների, մշակութաբանների, հոգևորականների և ազգագրագետների հետ: Նպատակն է հնարավորություն ստեղծել հայացք գցելու մեր ազգային նկարագրի, արժեհամակարգի, ազգային առանձնահատկության վրա՝ մշակույթին, պատմությանը և ազգային ժառանգությանը ծանոթանալու միջոցով, հնարավորություն ստեղծել վերլուծել ազգային առանձնահատկությունները և նորովի անդրադառնալ պատմությանն ու դրա դասերին:
Արարատյան Հայրապետական թեմի տեղեկատվական բաժին
Զորավոր Սուրբ Աստվածածին եկեղեցի