Աստված չի պատասխանում

Մի ճգնավոր մի ամբողջ տարի պահք պահեց՝ ուտելով միայն շաբաթը մեկ անգամ:

Եվ այդպիսի ջանքերից հետո խնդրեց, որպեսզի Աստված բացատրի իրեն Սուրբ Գրքից մի հատվածի միտքը միայն: Եվ ոչինչ չլսեց ի պատասխան:

- Իզուր այսքան ժամանակ վատնեցի,- ինքն իրեն ասաց վանականը,- Ինչպիսի՜ զոհողությունների գնացի ի սեր Աստծո, իսկ Նա ինձ չի պատասխանում: Ավելի լավ է գնամ այստեղից և թող որևէ կրոնուսույց բացատրի ինձ այդ հատվածի իմաստը:

Եվ այստեղ հայտնվեց հրեշտակն ու ասաց.

- Տասներկու ամիսների պահքը քեզ միայն այնտեղ բերեց, որ հավատացիր իբրև թե ավելի լավն ես մյուսներից, իսկ Աստված չի լսում ունայն ամբարտավաններին: Իսկ, երբ խոնարհաբար համաձայնվեցիր մերձավորիցդ խորհուրդ հարցնել, ապա Տերն ինձ ուղարկեց քեզ մոտ:

Եվ հրեշտակը ճգնավորին բացատրեց այն ամենն, ինչ նա ցանկանում էր իմանալ:

Ռուսերենից թարգմանությունը՝ Էմիլիա Ապիցարյանի