Եկեղեցուն անդամագրված և Աստծո որդեգրությունն ընդունած ամեն մի անձ աստվածապարգև իր կյանքն իմաստավորում և լուսավորում է պատվիրանապահությամբ, ճշմարիտ հավատին վայել կյանքով՝ նպաստելով իր և իրեն շրջապատող մարդկանց հոգևոր աճին: Այս դեպքում, Սբ. Պետրոս առաքյալի խոսքի համաձայն, բոլորը փորձում են համախոհ, ուրախակից և ցավակից լինել միմյանց հանդեպ, եղբայրասեր, բարեգութ և խոնարհամիտ (Ա Պետրոս 3:8):
Սեպտեմբերի 20-ին Զորավոր Սբ. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը համայնքի կարիքավոր անդամ 31-ամյա Սեդրակյան Ծաղիկին հանձնեց մոսկվաբնակ Թորոսյան Դոնարայի կողմից տրամադրած դրամական օգնությունը (40 000 դրամ): Ծաղիկն արդեն չորս տարի է, ինչ ամուսնալուծված է, և ամուսինը հրաժարվել է ալիմենտ վճարելուց: Նա միայնակ է խնամում իր չորս անչափահաս զավակներին: Նրա դուստրերից Ներսիսյան Աննան (15 տ.) տեսողության հետ կապված խնդիր ունի. նրա մի աչքը չի տեսնում, մեկ անգամ վիրահատվել է և կրկին վիրահատության անհրաժեշտություն կա: Կարիքավոր ընտանիքն ապրում է վարձակալությամբ, Ծաղիկը ժամանակ առ ժամանակ է աշխատում, իսկ ընտանեկան նպաստով էլ փորձում է վճարել տան վարձը, մասամբ էլ՝ կոմունալ ծախսերը: Նոր ուսումնական տարում բազմազավակ մոր համար մեծ խնդիր էր լուծել երեխաների դպրոց հաճախելու հետ կապված ծախսերը: Եվ նա անչափ շնորհակալ էր այն ուշադրության և հոգատարության համար, որ ցուցաբերեց իր ընտանիքի հանդեպ Զորավոր Սբ. Աստվածածին եկեղեցու համայնքը՝ Տեր Գրիգորի գլխավորությամբ:
«Գթություն կարելի է անել՝ ըստ կարողության և ցանկության: Եթե մեկը չունի կարողություն և ունեցվածք՝ կարոտյալներին առատաձեռն օգնելու, թող այնքան տա, որքան կարող է: Մեր Տերն ասում է. «Ով այս փոքրիկներից մեկին միայն մի բաժակ սառը ջուր խմեցնի աշակերտի անունով, ճշմարիտ եմ ասում ձեզ, նա իր վարձքը չի կորցնի» (Մատթեոս 10:42) (Պողոս պատրիարք):
Կարինե Սուգիկյան
Զորավոր Սուրբ Աստվածածին եկեղեցի