Զորավոր Ս. Աստվածածին եկեղեցում իրականացվող սոցիալական ծրագրերի շնորհիվ ինչպես համայնքի, այնպես էլ Հայաստանում և արտերկրում բնակվող հավատավոր հայորդիներ, միախմբվելով եղբայրասիրության առաքինության շուրջ, կյանքի են կոչում սուրբգրային հետևյալ պատգամը, որ ասում է. «Եղբայրասիրությունը թող մնայուն սկզբունք լինի ձեզ համար» (Եբր. 13:1): Ճշմարիտ կրոնի մեծագույն նշանն այն է, որ մարդ-Աստված հարաբերությամբ ձևավորվում և ամրանում է նաև մարդ-մարդ հարաբերությունը:
Զորավոր Ս. Աստվածածին եկեղեցու համայնքը, «Արև-երեխաներ» երեխաների առողջության և զարգացման կենտրոնի հետ համատեղ, սոցիալական ծրագրերի շրջանակներում, շարունակում է աջակցել Դաունի համախտանիշ ունեցող երեխաներին: Դեկտեմբերի 23-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Մարկոսյան Անահիտին (61 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Տիկին Անահիտն իր որդու՝ Դաունի համախտանիշ ունեցող Ախվերդյան Վազգենի (21 տ.) հետ վարձակալությամբ բնակվում է Դավթաշեն 7-րդ փ. 1-ին տուն հասցեում: Վազգենը սովորել է Երևանի թիվ 6 արհեստապետական ուսումնարանի ներկարարական բաժնում, վերականգնողական կենտրոն է հաճախել, իսկ այժմ ոչնչով չի զբաղվում: Կարիքավոր ընտանիքը միայն ընտանեկան նպաստի և Վազգենին տրամադրվող հաշմանդամության գումարով դժվարությամբ է հոգում իր կարիքները: Տիկին Անահիտն անչափ շնորհակալ էր աջակից անձին՝ օգնության ձեռք մեկնելու համար:
«Բնությունից տրված ամեն բան պետք է հիանալի համարել, և եթե մեկը գերակշռում է մյուսներին իր հարստությամբ, սակայն այն, ինչ ունի բարի գործերի համար է ծառայեցնում, ապա նրան պետք է սիրել և հարգել ինչպես մարդու, ով առատաձեռնորեն ողորմություն է տալիս աղքատներին և սեփական ձեռքերով ծառայում կարիքավորներին, իսկ ով նման կերպով չի վարվում հարստության հետ, ապա դրան առավել թշվառ պիտի համարենք, քան՝ նախանձի արժան: Քանզի դա նշանակում է մեծ ջանասիրությամբ նպաստել սեփական կորստին: Իսկ եթե դրանք ծառայում են առաքինությունների համար, ապա նախանձի տեղ չկա, որովհետև հարստությունն օգտագործվում է բոլորի շահի համար»,- ասել է Ս. Բարսեղ Կեսարացին:
Կարինե Սուգիկյան
Զորավոր Սուրբ Աստվածածին եկեղեցի