Գրքեր

Երիտասարդները Հոգեգալստյան տոնը նշեցին ուխտագնացությամբ

Այս տարի Հայ Առաքելական Սուրբ եկեղեցին Հոգեգալստյան տոնը նշեց հունիսի 5-ին: Սուրբ Հոգու էջքի տոնը Զորավոր Ս. Աստվածածին եկեղեցու «Զորավոր» երիտասարդաց միությունը նշեց ուխտագնացությամբ: Մինչ ճանապարհ ընկնելը երիտասարդները միության հոգևոր պատասխանատու Տեր Վահան քահանա Առաքելյանի օրհնությանն ու բարեմաղթանքին արժանացան: Տեր Հայրը մաղթեց երիտասարդներին, որ ոչ միայն Սուրբ Հոգու շնորհներով լցվեն, այլև հարստանան նրանցով և իրենց կյանքում մշտապես ճաշակելով Սուրբ Հոգու շնորհների քաղցրությունը՝ զգան դրանցով առաջնորդվելու բերկրանքը և պտուղների քաղցրությունը։  

Երիտասարդ ուխտավորների աղոթքի ուղին նրանց առաջնորդեց դեպի Ապարանի Ս. Խաչ եկեղեցի: Վաղ միջնադարյան սրբավայրում երիտասարդները նախ մասնակցեցին Առավոտյան ժամերգությանը, ապա տոնական Ս. Պատարագին: Երիտասարդաց միության անդամները, դիմելով Սուրբ Երրորդության երրորդ անձին՝ Սուրբ Հոգուն, հայցեցին, որ Նա առաջնորդի և զորացնի իրենց եկեղեցանվեր ծառայության մեջ, ուժ, զորություն և համբերություն շնորհի Հայոց ազգին՝ հաղթահարելու իր առջև ծառացած փորձությունները, անսասան ու խաղաղ պահի Հայաստան և Արցախ աշխարհները:  
Սիրո ճաշը վայելելուց հետո երիտասարդները ճանապարհվեցին դեպի Ստեփանավանի «Սոճուտ» բուսաբանական այգի: Զբոսնելով այգու ծառուղիներով՝ երիտասարդները հիանում էին Աստծու շնորհած պարգևներով՝ աշխարհի տարբեր անկյուններից բերված տասնյակ ծառերով, շնչում սոճու բույրով հագեցած թարմ օդը:  Աստվածային օրհնությամբ և զորությամբ գոտեպնդված՝ երիտասարդ ուխտավորները վերադարձան Երևան:

 

Կարինե Սուգիկյան

07.06.22
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․