Աստվածային սերը մարդու մեջ գործում է ողորմածությամբ, իսկ սերը դեպի այս առաքինությունը, անկասկածելիորեն, մարդու առջև բացում է Երկնքի Արքայության դուռը՝ հիշեցնելով երանիներից հինգերորդը՝ երանի՜ ողորմածներին, որովհետև նրանք Աստծուց ողորմություն պիտի գտնեն (Մատթեոս 5:7):
Հուլիսի 15-ին Զորավոր Սբ. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Էջմիածնի Առատաշեն գյուղի Սայաթ-Նովա 21 հասցեում բնակվող բազմազավակ կարիքավոր ընտանիքին: Ութ հոգուց բաղկացած ընտանիքի կարիքները փորձում է հոգալ ընտանիքի որդին, ով ծառայում է Ազգային անվտանգության ծառայության սահմանապահ զորքերում: Սահակյան Մանուկը (53 տ.) նշեց, որ առողջական խնդիրների պատճառով ինքն այս տարի ի վիճակի չի եղել աշխատելու, այլևս ընտանեկան նպաստ չեն ստանում, իսկ որդու աշխատավարձը չի բավարարում իր, կնոջ, հարսի և չորս անչափահաս թոռնիկների կարիքները հոգալու համար, այդ պատճառով կինը ժամանակավոր աշխատանքի է անցել դաշտում, թեև սրտի հետ կապված խնդիրներ ունի:
Տեր Գրիգորը բժշկության աղոթք կարդալուց հետո ընտանիքին հանձնեց ամերիկաբնակ Կարեն Վարդանյանի աջակցությամբ գնված սննդի փաթեթներ և հիգիենիկ պարագաներ:
Ներող, ողորմած, համբերող և խնամող է Աստվածային Սերը: Այդ անհուն Սերը, որ սավառնում է մեզ վրա, ոչ թե պարտավորության զգացման, այլ բնական ձգտման է տանում մեզ սիրելու Նրան՝ Ով մեզ նախ սիրեց և սիրելու մեր նմանին: Սիրելու կարողությունը բնածին է յուրաքանչյուր կենդանի արարածի, հատկապես մարդկանց մեջ: Եթե Աստծուն և մեր նմանին չսիրենք անհատույց սիրով, ապա սերը մեր մեջ կկորցնի իր աստվածային բնույթը և կվերածվի անձնասիրության:
Կարինե Սուգիկյան
Զորավոր Սուրբ Աստվածածին եկեղեցի