1 Փետրվար, Դշ, Առաջավորաց պահքի Գ օր

Գրքեր

«Հայրենասիրությունը շնորհ է, քանզի կարող է լինել, երբ մեր հոգում կա Աստված»

Բոլոր ժամանակներում Աստծուն ճշմարտապես սիրող քրիստոնյան անկեղծորեն սիրել է նաև իր հայրենիքը և ապրել ու գործել հանուն հայրենիքի շինության և բարգավաճման: Հայրենասերներից ոմանք նախանձախնդրորեն գործել են իրենց հայրենիքի բարեկարգության և հոգևոր լուսավորության համար, ոմանք նպաստել են հայրենիքի բարգավաճմանն արվեստի, մշակույթի և իրենց գիտելիքի միջոցով, ոմանք խիզախորեն պաշտպանել են հայրենիքը թշնամիներից և անգամ իրենց կյանքը զոհել հանուն հայրենիքի: Հայոց պատմության էջերը հարուստ են հայրենիքի հանդեպ նման սիրո օրինակներով:

Հայրենիքի հանդեպ ամուր սերն ուներ իր սրտում Հադրութի բնակիչ, ռազմաբժիշկ Արեն Վերդյանը (36 տ.), ով արցախյան վերջին պատերազմին մասնակցեց որպես Հադրութի դիվիզիայի ռազմական ծառայությունների պետ և պատերազմի վերջին օրը՝ նոյեմբերի 9-ին, զոհվեց Կարմիր շուկայում իր ծառայողական պարտականությունը կատարելիս: Հերոսի կինն իր անչափահաս որդու հետ այժմ վարձակալությամբ բնակվում է Երևան քաղաքի Տիգրան Մեծ 36, բն. 146 հասցեում:

Հուլիսի 1-ին Զորավոր Ս. Աստվածածին եկեղեցում հոգևոր հովիվ Տեր Գրիգոր քահանա Գրիգորյանը հերոսի կնոջը՝ Սուսաննա Սարգիսովային (49 տ.), որպես սիրո և երախտագիտության արտահայտություն, փոխանցեց 100 000 դրամ, որ տրամադրել էր Զորավոր Ս. Աստվածածին եկեղեցու համայնքի անդամներից մեկը, ով չցանկացավ նշել իր անունը: Սուսաննան իր երախտագիտությունը հայտնեց Տեր Գրիգորին և աջակից անձին:

«Հայրենասիրությունը պարտք չէ, այլ՝ մարդու բնական հատկություն, մարդկային էություն, մարդկային երջանկություն: Հայրենասիրությունը շնորհ է, քանզի կարող է լինել, երբ մեր հոգում կա Աստված, Հայրենիք ու Հայրենյաց սրբություններ»,- ասել է Գարեգին Բ Ամենայն Հայոց կաթողիկոսը:

 

Կարինե Սուգիկյան

01.07.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․