Գրքեր

Կախարդված կինը

Մի անգամ սուրբ Մակար Եգիպտացու աշակերտները անապատով եկող մի մարդու տեսան, ով մի ձի էր բերում իր ետևից ու գալիս էր դեպի ծեր վանականի խուցը: Աշակերտները փորձեցին ճամփորդին համոզել վանականին չշեղել աղոթքից, սակայն շուտով տեղի տվեցին նրա խնդրանքներին ու թույլ տվեցին խուց մտնել: Ճամփորդն ուրախացավ ու իր ձիու հետ ներս գնաց: Սուրբ Մակարի աշակերտները վրդովվեցին ու հարցրեցին, թե ինչու է ձիուն իր հետ տանում: Օտարականը պատասխանեց, որ նա սրբի աղոթքների կարիքն ունի: Վանականները զարմացան, թե այդ մարդը որքան է իր ձիուն սիրում, քանի որ այդքան երկար ճանապարհ էր կտրել ամայի անապատով: Ինչո՞ւ է այդ կենդանին այդքան թանկ նրա համար և ի՞նչ է նրան պատահել:

- Ձին, որ տեսնում եք,- ասաց տղամարդը,- իմ դժբախտ կինն է ու ես չգիտեմ, թե ինչպես է կենդանու վերածվել: Ահա, արդեն երեք օր է, ինչ նա ոչինչ չի կերել:

Վանականները հավատացին ճամփորդին: Չնայած, որ Քրիստոսի ուսմունքն արդեն երեք հարյուր տարի տարածված էր աշխարհում, Եգիպտոսում դեռևս մեծ ազդեցություն ուներ հեթանոսությունը, և կախարդության այդ հնագույն օրրանը լի էր զանազան կախարդներով, ովքեր վնասում էին քրիստոնյաներին: Այդ պատճառով էլ, երբ վանականները տղամարդու պատմածը լսեցին՝ շտապեցին աբբա Մակարին տեղեկացնել կատարվածի մասին: Սակայն դրա կարիքը չկար, քանի որ Աստված սրբի համար արդեն բացել էր կատարվածի պատճառը. Մի անառակ եգիպտացի հավանել էր այդ մարդու կնոջն ու ցանկացել գայթակղել: Սակայն նրա բոլոր ջանքերն ապարդյուն էին: Այդժամ, որպեսզի կնոջ սրտում պատասխան կիրք արթնացնի՝ դիմել էր կախարդի օգնությանը: Վերջինս բավականին մեծ գումար էր ստացել և իր ողջ կախարդությունն օգտագործել էր քրիստոնյա կնոջը գայթակղության մեջ գցելու համար, սակայն իր նպատակին չէր հասել: Անհաջողությունից կատաղած՝ կարողացել էր գոնե այնպես անել, որ կինը շրջապատի մարդկանց աչքին ձի թվար: Նրա դժբախտ ամուսինը շատերին էր դիմել՝ օգնության ակնկալիքով, սակայն ոչ ոք չէր կարողացել օգնել նրան, նույնիսկ տեղի քահանաները: Ոչ ոք չգիտեր, թե ինչպես կնոջն իր արտաքին տեսքին վերադարձնի: Այդ պատճառով էլ հուսահատ ամուսինը նրան մեծ ճգնավորի մոտ էր բերել՝ լսելով նրա գործած հրաշքների մասին:

Կնոջը նայելով՝ սուրբ Մակարն իր աշակերտներին ասաց.

- Ես նրա մեջ կենդանական ոչինչ չեմ տեսնում, դա նրա մարմնում չէ, այլ նրան նայող աչքերում: Դա դիվական պատրանք է, այլ ոչ թե իրականություն:

Այնուհետև սուրբը օրհնեց ջուրը, լցրեց կնոջ վրա ու աղոթեց: Կախարդանքն անցավ, և բոլորը ձիու փոխարեն մարդ տեսան իրենց առջև: Սուրբը կարգադրեց կերակուր տալ նրան և տուն ճանապարհելով՝ խորհուրդ տվեց.

- Երբեք մի՛ դադարիր եկեղեցի այցելել ու երբեք մի՛ խուսափիր Սուրբ Հաղորդություն ստանալուց: Այդ դժբախտությունը քեզ հետ պատահեց, որովհետև արդեն հինգ շաբաթ չէիր հաղորդվել մեր Փրկչի Սուրբ Մարմնին:

 

Ռուսերենից թարգմանությունը՝ Էմիլիա Ապիցարյանի 

08.03.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․