Կեղծ հիվանդը

Մի մարդ տեսակցության գնաց իր հիվանդ ընկերոջը: Ներս մտնելով՝ ողջունեց հիվանդին:

- Ի՞նչ: Ի՞նչ է,- արձագանքեց նա:

- Հարցնում եմ ինչպե՞ս է առողջությունդ,- ավելի բարձր կրկնեց ընկերը:

- Հիվանդ եմ, չգիտեմ, թե հետս ինչ է կատարվում... Կարծես թե ինչ-որ ծանր հիվանդություն է, որովհետև ոչինչ չեմ ուզում, ո՛չ տեսնել, ո՛չ լսել,- պատասխանեց հիվանդը:

Սակայն հյուրի ուշադրությունն այն փաստը գրավեց, որ ընկերը լավ տեսք ունի և ամենևին էլ հիվանդ մարդու տպավորություն չի թողնում:

- Միգուցե թվո՞ւմ է քեզ: Հնարավոր է ուղղակի վատ տրամադրություն ունես և վերջ,- ասաց նա:

- Ոչ-ոչ, լուրջ հիվանդություն է: Մենք ուզում ենք մի փորձառու և լուրջ բժիշկ հրավիրել:

- Պարզ է,- մտախոհ արտասանեց ընկերն ու որոշեց փորձել, թե որքան ծանր է իր խեղճ ընկերոջ հիվանդությունը:

- Լսիր,- շշուկով հարցրեց իր խլացած ընկերոջը,- իսկ ինչո՞ւ է այսքան փող թափված սենյակիդ հատակին:

- Ո՞ւր է, որտե՞ղ, հապա ցույց տուր,- անմիջապես աշխուժացավ ընկերը՝ անկողնուց դուրս ցատկելով:

- Ներիր, ինձ ուղղակի թվաց,- ծիծաղեց հյուրը,- բայց որ դու լիովին առողջ ես՝ ես վստահ եմ:

«Որովհետև տրտմությունը, ըստ Աստծու ուզածի, ապաշխարություն է առաջ բերում փրկության համար, որը զղջում չի պատճառում. իսկ աշխարհի տրտմությունը մահ է առաջ բերում» (Բ Կորնթ. 7:10):

Ռուսերենից թարգմանությունը՝ Էմիլիա Ապիցարյանի