Քրիստոնյան կոչված է լինելու այն լույսը, որի մասին Տերն ասաց. «Դո՛ւք եք աշխարհի լույսը: Մի քաղաք, որ լեռան վրա է կառուցված, չի կարող թաքնվել: Ոչ ոք ճրագը վառելով կաթսայի տակ չի պահում, այլ այն դնում է աշտանակի վրա, որպեսզի լույս տա տան մեջ գտնվողներին: Այդպես էլ թող ձեր լույսը շողա մարդկանց առջև, որպեսզի նրանք տեսնեն ձեր բարի գործերը և փառավորեն ձեր Հորը, որ երկնքում է» (Մատթ. 5:14-17): Քրիստոսով, այսինքն՝ ճշմարտությամբ և հավիտենական լույսով լուսավորված անձը փարատում է իր շուրջը գտնվող խավարը: «Եթե օրն ամպամած է, լուսավորիր ինքդ այն բարությամբ, որ ունես քո մեջ և շուրջդ կդառնա լուսավոր»,-ասել է վանական Սիմեոն Աթոսացին:
Փերտրվարի 1-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը սիրահայ համայնքից Օրուլյան Արշալույսին (55 տ.) հանձնեց դրամական օգնություն (100 եվրո), որ տրամադրել էին Ավստրիայում բնակվող ամուսիններ Օհանէս Նալպանտեանը և Մարօ Աւետիսեանը: Սիրիայում ծագած պատերազմի պատճառով տիկին Արշալույսն իր ամուսնու՝ Քախքեջյան Զարեհի (57 տ.), երկու որդիների՝ Գևորգի (26 տ.) և Շանթի (22 տ.) հետ միասին յոթ ամիս առաջ տեղափոխվել է Հայաստան՝ վարձակալությամբ բնակվելով Լազոյի փ. 31 հասցեում: «2014 թ-ին մայիսի 16-ին զոհվեց որդիս՝ Անդրանիկը, որ ծառայում էր սիրիական բանակում, երեք ամիս անց ամուսինս ծանր վիրավորվեց, մեր տունն ավերվեց: Այժմ ամուսինս առողջական խնդրի պատճառով ի վիճակի չէ ծանր աշխատանք կատարելու, իսկ թեթև աշխատանք դեռ չի կարողանում գտնել, միայն ավագ որդիս՝ Գևորգն է աշխատում: Մեր գալուց ի վեր մեր տան վարձը մասամբ վճարում է «Առաքելություն Հայաստան» բարեգործական հասարակական կազմակերպությունը: Անչափ շնորհակալ եմ Տեր Գրիգորին և աջակից ընտանիքին՝ օգնության ձեռք մեկնելու համար»,- ասաց տիկին Արշալույսը:
Կարինե Սուգիկյան
Զորավոր Սուրբ Աստվածածին եկեղեցի