19 Մարտ, Գշ, Մեծ պահքի ԼԷ օր

Գրքեր

Մարդասիրության մասին

Երեք նշանավոր  ավազակներ կային, որոնք բազում տեղերում բազում  չարիքներ էին գործել: Օրերից մի օր սրանք  գալիս են մի վանք և որեւէ կերակուր խնդրում: Վանքի վերակացուն էլ խստորեն կշտամբում է նրանց՝ ասելով.

- Դուք արյունարբու գողե՛ր ու ավազակնե՛ր, ոչ միայն չեք ամաչում ուրիշների վաստակը հափշտակելուց, այլև համարձակվում եք անամոթաբար Աստծո ծառաներին տրված ողորմությունն ուտել: Արժանի չեք երկրի վրա ապրելու, քանի որ ոչ Աստծուց եք երկնչում, ոչ էլ մարդկանցից ամաչում: Հեռացե՛ք ձեր չար գործերով հանդերձ և այլևս չհանդգնեք այստեղ վերադառնալ:

Իսկ նրանք զայրացած ու  խիստ սրտնեղված ետ դարձան:

Եվ ահա նույն օրը վանահայրն ինչ-որ  տեղից վերադառնում է՝  հետն ունենալով մի քանի նկանակ և մի շիշ գինի, և վերակացուից  լսելով, թե ինչպիսի պատասխան էր տվել ավազակներին, հանդիմանում է նրան ասելով՝ թե.

- Անիրավորրեն ես դա արել, քանզի մեղավորները մարդասիրությամբ և քաղցրությամբ  ավելի  դյուրությամբ են դարձի գալիս, քան սպառնալիքներով ու խստությամբ, որովհոտև Քրիստոս Աստված վարդապետը մեր, Ում Ավետարանը խոստացաք պահել,  ասել  է.

- Բժիշկն առողջների համար չէ , այլ՝ հիվանդների: Չեկա կանչելու արդարներին, այլ մեղարվորներին: Այդ պատճառով էլ շատ անգամ մեղավորների հետ էր ուտում: Արդ, քանի որ այդ արել ես ընդդեմ սիրո և Քրիստոսի պատվիրանի, սուրբ հնազանդության համար հրամայում եմ քեզ, որ հենց հիմա առնես այս նկանակն ու շշով գինին,  շուտափույթ փնտրես ավազակներին և   գտնելով նրանց՝ ընծայես իմ անունից: Եվ ապա՝ ծնկելով նրանց առաջ, խոնարհությամբ խոստովանես քո հանցանքը, որ նման տրտմությամբ ու խստությամբ վարվեցիր նրանց հետ: Եվ կաղաչես նրանց, որպեսզի այլևս այդպիսի չար գործեր չանեն, այլ երկյուղեն Տեր Աստծուց և ընկերներին էլ չվնասեն: Եվ եթե այս անեն, խոստանում եմ բոլոր նրանց մարմնական պետքերը հոգալ: Այս կասես նրանց աւ այնտեղից  կվերադառնաս:

Եվ երբ սա գնաց փնտրելու ավազակներին, վանահայրը եկավ  աղոթքի կանգնեց առ Աստված, որպեսզի նրանց  զղջում և ապաշխարության դարձ տա:

Արդ, երբ ավազակներն ուտում էին այն ողորմությունը, որն ուղարկել էր նրանց Աստծո մարդը, սկսեցին միմյանց հետ խոսել՝ ասելով. «Վայ՜ մեզ՝ եղկելիներիս և թշվառներիս, թե դժոխքի որքան մեծ ու անտանելի տանջանքներ են մեզ սպասում, որ ոչ միայն կողոպտում ենք մարդկանց ստացվածքներից, այլև զրկում ենք կյանքից, և սակայն, այսքան մեծամեծ չարիքներից և մարդասպանություններից հետո ամենևին ոչ Աստծուց երկյուղ ունենք և ոչ էլ խղճմտանք:  Իսկ  ահա այդ սուրբ եղբայրը, որ եկել է մեզ մոտ, այնքան փոքր  մի բանի համար, որ  մեզ արդարորեն, մեր իսկ չարությանից դրդված՝ մեզ հանդիմանել էր, իրեն այսքան խոնարհեցրեց և դատապարտեց՝ մեր առաջև, և մանավանդ՝  նման առաքինի և սուրբ այրը մեզ առատ խոստումներ պարգևեց, հաց ու գինով մեր պետքերը լցրեց: Արդարև, դրանք են սրբերն Աստծո. որոնք երկինքը պիտի ժառանգեն: Իսկ մենք՝ կորստյան որդիներս, օրըստօրե ավելացնում ենք հավիտենական դժոխքի մեր տանջանքերը, չգիտենք, թե կարող ենք ողորմություն գտնել Աստծուց՝ այսքան չար ու զազիր մեր գործերի համար»:

Նրացից մեկը, երբ նման բաներ էր խոսում, մյուս երկուսն  ասում են. «Այդ դեպքում ինչ՞ անենք»: Եվ նա ասում է. «Գնանք՛  Աստծո մարդու  մոտ և եթե նա մեզ  հույս տա, որ մենք՝ նման չարագործներս, կարող ենք ողորմություն  գտնել Աստծուց:  Մեզ մի անգամ պատվիրածը կանե՛նք, միայն թե կարողանանք  մեր հոգիներն ազատել դժոխքի գեհենից»:

Հավանություն տալով սրան՝  երեքն էլ մեկ առ մեկ գնում են  Աստծո մարդու մոտ, ասում.

- Հայր՛, մենք մեր մեծամեծ չարագործությունների պատճառով տարակուսանքի մեջ ենք՝  արդյոք՞ կարող ենք Աստծուց ողորմություն գտնել: Բայց եթե դու մեզ հուսադրես, թե Աստված երես չի դարձնի մեզնից, ահավասիկ, պատրաստ ենք քեզ հետ ապաշխարել,  և այն ամենին, ինչ որ մի անգամ պատվիրես մեզ , կամենում ենք հնազանդ լինել: Իսկ Աստծո մարդը նրանց սիրով ու քաղցրությամբ ընդունեց և զանազան ապացուցներ մեջբերելով՝  հավաստիացրեց նրանց Աստծուց մարդասիրություն գտնելու մասին: Ինչպես նաև խոստացավ նրանց՝  Տեր Աստծո շնորհն ու ողորմությունը  գտնելու մասին՝   ուսուցանելով նրանց, թե որքան  մեծ է Աստծո մարդասիրությունը մեր անթիվ մեղքերի դեմ. թեև անսահման են՝  հաղթահարում են  և թաքցվում և մանավանդ, որ մեր Տեր Հիսուս Քրիստոսը մեղավորների համար աշխարհ եկավ, որպեսզի փրկի նրանց:

Արդ,  ավազակները հրաժարվելով աշխարհից ու իրենց չար գործերից՝  ընդունելի եղան Տեր Աստծուն եւ Նրանով զգեստավորվեցին  ու սրտով կենդանացան: Նրանցից երկուսը կարճ ժամանակի ընթացքում  գովելի վարք ձեռք բերեցին, հրավիրվելով  Տիրոջից՝ այս աշխարհից տեղափոխվեցին: Իսկ երրորդը երկար ապրեց, և մշտապես, մտովի անցկացնելով իր  ծանր ու զանազան մեղքերը,  անչափ ապաշխարեց: Ընդհուպ հիսուն տարի՝ որքան, որ ապրում էր,  հացով ու ջրով էր միայն անցկացնում, միշտ բոկոտն էր շրջում և գիշերն աղոթքի կանգնում և մինչև առավոտ չէր քնում: Եվ ապա այդպիսի ճգնասեր առաքինությամբ առ Աստված, հրեշտակների առաջնորդությամբ, տեղափոխվեց:

 

Հայելի վարուց

17.09.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․