Գրքեր

Մեծագույն արվեստը հոգու սրբությանը հասնելն է

Ըստ Տիրոջ հորդորի՝ քրիստոնյան ամեն օր պետք է ձգտի կատարելության. «Կատարյա՛լ եղեք դուք, ինչպես ձեր երկնավոր Հայրն է կատարյալ» (Մատթ. 5:48): Եկեղեցու հայրերն այս մասին ասում են, որ մարդն ամենուր՝ թե՛ ընտանիքում, թե՛ աշխատանքային, ընկերային և այլ միջավայրերում, կարող է հասնել սրբության ու կատարելության և կարող է հասնել խոնարհության, համբերության ու սիրո միջոցով: Ամեն օրը պետք է ապրել որպես նոր սկիզբ, ապրել նոր խանդավառությամբ, սիրով, աղոթքով և լռությամբ: Մեծագույն արվեստը հոգու սրբությանը հասնելն է:

Զորավոր Ս. Աստվածածին եկեղեցու համայնքը, «Արև-երեխաներ» երեխաների առողջության և զարգացման կենտրոնի հետ համատեղ, աջակցում է այն ընտանիքներին, որտեղ մեծանում են Դաունի համախտանիշ ունեցող երեխաներ: Նոյեմբերի 9-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Ավետիսյան Մարոյին (50 տ.) հանձնեց դրամական օգնություն (100 ԱՄՆ դոլար), որ տրամադրել էին արտերկրում բնակվող Տեր և Տիկին Արտաշէս և Հերմանս Բէմպեյաններն իրենց սանիկի՝ Լուսին Մարոյի մկրտության առթիվ:

Տիկին Մարոն Զորավոր Ս. Աստվածածին եկեղեցի էր եկել որդու՝ Սարգիս Նալբանդյանի հետ (11 տ.), ով Դաունի համախտանիշ ունի: Սարգիսն իր ծնողների և քրոջ հետ բնակվում է Արշակունյաց 135-Բ շենք 18 բն. հասցեում: Նա սովորում է Երևանի թիվ 12 հատուկ դպրոցում, սիրում է երգել, պարել, թատերական ներկայացումների մասնակցել: «Սարգիսը սրտի արատով է ծնվել, ութ ամսականում վիրահատվել է և առ այսօր բժիշկների հսկողության ներքո է: «Արև-երեխաներ» երեխաների առողջության և զարգացման կենտրոնի աջակցությամբ տղաս բուժստուգումներ անցավ և պարզվեց, որ նա նաև վահանաձև գեղձի ֆունկցիայի խանգարում ունի և պետք է բուժումներ ստանա: Շնորհակալ եմ «Արև-երեխաներ» երեխաների առողջության և զարգացման կենտրոնին ու աջակից Բէմպեյան ընտանիքին՝ ուշադրության և հոգածության համար»,- ասաց Սարգիսի մայրը:

Տիկին Մարոն ևս առողջական խնդիրներ ունի, բայց ֆինանսական խնդիրների պատճառով չի կարողանում բժշկի դիմել: «Ամուսինս մշտական աշխատանք չունի՝ մեկ շաբաթ առաջ ստիպված եղավ մեկնելու արտագնա ախատանքի: Այժմ միայն դուստրս է աշխատում, նա անցյալ տարի ավարտել է Եվրոպական ակադեմիայի տնտեսագիտական ֆակուլտետը»,- ասաց նա:

Ս. Գրիգոր Նարեկացու հայրը՝ Խոսրով Անձևացին, անհրաժեշտ է համարում ոչ միայն ողորմություն գործել, այլև՝ մեծ փափագով խնդրել Աստծուց, որ բացի մեր միտքը՝ առատապես հորդորվելու ողորմածության սիրով, որպեսզի պատշաճ ժամին արժանի լինենք փոխարենն ստանալու Երկնքի Արքայությունում:

 

Կարինե Սուգիկյան

09.11.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․