Միասնական աղոթք՝ հանուն հայրենիքի

Սեպտեմբերի 19-ին՝ Անկախության տոնին ընդառաջ, Զորավոր Ս. Աստվածածին եկեղեցու համայնքից տասը տղամարդիկ, հանուն հայրենիքի խաղաղության և անսասանության, ուխտագնացության մեկնեցին Սևանավանք: Ուխտավորները, հոգևոր հովիվ Տեր Գրիգոր քահանա Գրիգորյանի գլխավորությամբ, միասնական աղոթքի կանգնեցին Զորավոր Ս. Աստվածածին եկեղեցուն կից Ս. Անանիայի մատուռ-դամբարանում, ապա Տեր Հոր օրհնությունն ստանալուց հետո շարժվեցին դեպի ուխտավայր:

Հայ եկեղեցու առաջին հայրապետի՝ Ս. Գրիգոր Լուսավորչի կողմից հիմնադրված վանքի Ս. Առաքելոց եկեղեցում ուխտավորները մասնակից եղան Ս. Պատարագի: Ուխտավորների միասնական աղերսն էր առ Աստված, որ Տերն Իր ամենազոր Աջով պահապան լինի Հայոց ազգին, խաղաղության մեջ պահի հայրենիքի սահմանները, և որ յուրաքանչյուր հայորդի, բարձր գնահատելով Հայոց աշխարհին շնորհված Աստծու պարգևը՝ անկախությունը,  հոգենորոգման ճանապարհով ապրի և գործի՝ որպես Մայր հայրենիքի և Մայր եկեղեցու նվիրյալ զավակ: 

Քրիստոնյա լինել՝ նշանակում է Քրիստոսի Մարմինը կազմող եկեղեցու համայնքի անդամ լինել: Համայնքային կյանքում հատուկ զորություն ու նշանակություն ունի միասնական աղոթքը, որը միավորում է մեծ ընտանիքի անդամներին Ս. Պատարագի, ժամերգություների և ուխտագնացությունների ժամանակ: Մեր Տեր Հիսուս Քրիստոս Ինքն ընդհանրական աղոթքի օրինակը տվեց՝ աղոթելով ոչ միայն միայնության մեջ, այլև մարդկանց առջև (Հովհ. 11:41) և Իր աշակերտների մեջ (Հովհաննես 17): Իր երեքամյա քարոզչության ընթացքում վերջին Զատիկը Նա նշեց Երուսաղեմում՝ մասնակից լինելով ընդհանրական աղոթքին (Հովհ. 12:27-28):

Քրիստոնյա հայորդիների համար կարևոր օրինակ է Գարեգին Նժդեհի կյանքը, որի համար ամենից առաջ և գլխավորապես դրական իդեալը Աստված էր և հայրենիքը. «Հավատքի և պաշտամունքի համար առաջին տեղերը հատկացված են եղել Աստծուն և հայրենիքիս: Հայաստանն է եղել երկրավոր սրբազնագույնն ինձ համար: Շնչել, ապրել եմ նրանով՝ միշտ պատրաստ տառապելու, զոհաբերելու և մեռնելու նրա համար: Դա է եղել իմ սրբազան ցավը, կարոտը, ուրախությունը, իմ գոյության իմաստը, իմ անմահությունը, իմ գերագույն իրավունքն ու պարտականությունը…»:

Կարինե Սուգիկյան