«Ողորմած մարդն իր հոգու բժիշկն է»

Ապրիլի 5-ին Զորավոր Սբ. Աստվածածին եկեղեցու համայնքը, IDT-ARM ՍՊԸ-ի աջակցությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, իր հերթական այցով եղավ Շահումյան 2-րդ փողոցի 25-րդ տանը բնակվող սոցիալապես անապահով ընտանիքում: Վեց հոգուց բաղկացած ընտանիքն ապրում է երկու փոքր և խոնավ սենյակներում: Ընտանիքի անդամներից երեքը հոգեկան առողջության խնդիրներ ունեն, նրանցից ոչ ոք չի աշխատում, իսկ ընտանիքն ապրում է հաշմանդամության կենսաթոշակներով և ընտանեկան նպաստով: Խաչատրյան Արուսյակը (56 տ.) նշեց, որ խոնավության պատճառով իր թոռնիկների մոտ առողջական խնդիրներ են առաջ եկել՝ կապված շնչուղիների և արյան հետ:

Ընտանիքի հետ զրույցից հետո, Տեր Հայրը բժշկության աղոթք կարդաց և նրանց հանձնեց սննդի փաթեթներ:

Սբ. Եփրեմ Ասորին ասել է. «Ինչ ընդունակություններ, որ Աստված քեզ տվել է, օգտագործիր դրանք աղքատներին օգնելու համար, որպեսզի չդատապարտվենք սիրո պակասության և անգթության համար», իսկ Սբ. Իսահակ Ասորին էլ ասել է, որ կարծրացած և անգութ սիրտը երբեք չի մաքրվում: Իսկ ողորմած մարդն իր հոգու բժիշկն է, որովհետև ուժգին քամու պես իր միջից դուրս է քշում մթագնած կրքերը:

Աստծո պատկերն ու նմանությունը կրող մարդու բնական էությունն է բարին գործելն ու արարելը: Այդ դեպքում մարդն իրականացնում է այն, ինչն իրեն տրված է Աստծո կողմից ի ծնե: Իրական երջանկության գաղտնիքը բացահայտում է նա, ով, նկատելով մարդու կարիքը, փորձում է հնարավորինս օգնել ու աջակցել նրան՝ ևս մեկ անգամ հաստատելով այս խոսքերի էությունը՝ երջանիկ է երջանկացնողը:

«Մեր փրկության գաղտնիքը ծածկված է մերձավորի հետ մեր հարաբերությամբ: Դա է հաստատում Ավետարանը՝ ասելով. մի՛ դատիր, որ չդատվես, ներիր և կներվես, ինչ չափով, որ չափեք ուրիշներին, նույն չափով Աստված ձեզ կչափի: Այս և ուրիշ պատվիրաններն ուսուցանում են, որ Աստծո հետ մարդու հարաբերությունն անմիջականորեն կախված է մերձավորի հետ իր հարաբերությամբ: Երբ մենք չենք դատում, ներում ենք, օգնում ենք և բարյացակամ ենք մերձավորի հանդեպ, ապա և Աստված էլ մեզ չի դատի, կների և Իր օրհնությունը կպարգևի: Քրիստոս պատվիրան տվեց «Սիրիր մերձավորիդ»: Իսկ սիրելն ինչպե՞ս է արտահայտվում, սիրո գլխավոր օրինակն ո՞վ է հանդիսանում մեզ համար: Իհարկե Նա, Ով այնքան սիրեց աշխարհը, որ մինչև իսկ Իր Միածին Որդուն տվեց (Հովհաննես 3:16): Եվ Հիսուսն էլ ցույց տվեց մեզ Իրեն ու միմյանց սիրելու, բարեկամանալու ճշմարիտ ճանապարհը»,- ասաց Տեր Գրիգորը:

Կարինե Սուգիկյան