Աբբա Պիմենն, իր երկու եղբայրների հետ, խցում էր բնակվում ու կատարյալ լռություն էր պահպանում: Բայց կրտսեր եղբայրն անընդհատ կոպտորեն խախտում էր այդ լռությունը:
Եվ աբբան մյուս եղբորն ասաց.
- Մեր կրտսեր եղբայրը խախտում է մեր լռությունը: Հեռանա՛նք այստեղից:
Եվ կրտսեր եղբորը ոչինչ չասելով՝ հեռացան: Նկատելով, որ երկար ժամանակ չեն վերադառնում, կրտսերն էլ դուրս եկավ խցից ու տեսավ, որ արդեն բավականին հեռացել էին այդտեղից: Այդժամ բղավելով վազեց նրանց ետևից:
Աբբա Պիմենն ասաց.
- Սպասե՛նք նրան, քանի որ շնչակտուր է լինում:
Կանգ առան, և կրտսեր եղբայրը նրանց հասնելով՝ հարցրեց.
- Ո՞ւր եք գնում առանց ինձ:
Ծերը պատասխանեց.
- Հեռանում ենք քեզանից, քանի որ խախտում ես մեր որդեգրած ապրելակերպը:
- Ճշմարիտ եմ ասում ձեզ, ուր էլ գնաք, ձեզ հետ եմ գալու,- պատասխանեց եղբայրը:
Նրա հեզությունը տեսնելով՝ Պիմենն ասաց մյուս եղբորը.
- Վերադառնանք մեր խուցը, քանի որ նա դիտավորյալ չէ այդպես վարվում, այլ մարդկության թշնամին նրան որպես գործիք է օգտագործում:
Ռուսերենից թարգմանությունը՝ Էմիլիա Ապիցարյանի
Զորավոր Սուրբ Աստվածածին եկեղեցի