22 Դեկտեմբեր, Հիսնակի Ե Կիրակի
«Գրաբարի շտեմարան» գրքի ծնունդը Վեհափառ Հայրապետի օրհնությամբ կյանքի կոչած «Գրաբարյան օրեր» ծրագրի արգասիքն է, կազմակերպիչների և կրթության ոլորտի նվիրյալների ջանադրության լուսեղեն վկայությունը, չորսամյա տքնաջան աշխատանքի հանրագումարն է:
Օրհնյալ առաքելություն են ստանձնել գրքի հեղինակները, քանզի այն միտված է հանրակրթական դպրոցներում կատարելագործել գրաբար լեզվի ուսուցումը, ինչն էլ հնարավորություն կտա մեր զավակներին հաղորդ դառնալ ոսկեղենիկ գրաբար լեզվի ժառանգությանը:
Սիրելինե՛ր, աղոթքի՛ց են ծնվել հայոց տառերը, նրանք իրենց մեջ զորավոր ուժ ունեն: Եվ այդ ուժի ներգործությամբ է, որ հարյուրամյակներ անց հայոց հոգևոր և իմացական ժառանգությունը սերմանվում է մեր երիտասարդների հոգիներում: Նրանք գալիք ժամանակների երգեցիկ լեզվի սերմնացաններն են, Ոսկեդարի քերթողների արժանավոր հետնորդները: Նրանք ոսկյա գրաբարով աղոթողներն են, որով պիտի մերձենան և ճանաչեն Աստծուն ու Նրա խորհուրդները: Մեր զավակները այդ նույն լեզվով պիտի շարականներ երգեն՝ միանալով հրեշտակների երկնային փառաբանությանը: Գրաբարի իմացությամբ պիտի հաղորդ լինեն հայոց մատենագրության թողած բազմախորհուրդ ժառանգությանը: Հավատում ենք, որ երկնային օթևաններում ցնծում են հոգիները մեր թարգմանիչ վարդապետների ու քերթողահայրերի՝ իրենց գիրը ծաղկած տեսնելով հայոց հոգեմտավոր անդաստաններում:
Սիրելինե՛ր, սեպտեմբերը յուրովի աղերսներ ունի բառ ու բանի, կրթության և գիտելիքների ամբարման հետ: Շնորհավորում ենք նոր ուսումնական տարվա առիթով և մաղթում, որ «Գրաբարի շտեմարան»-ը մեր դպրոցականների համար դառնա այն ճանապարհը, որի շնորհիվ պիտի բացվեն ոսկեդարյա մատենագրության գանձարանները: «Ճանաչել զիմաստութիւն եւ զխրատ, իմանալ զբանս հանճարոյ…» (Առակաց Ա 1). ամեն մանուկ թող իր թոթովախոս լեզվով այբ, բեն, գիմից զատ հայոց դպրանոցներում հնչեցնի հայի հավատքի ու ինքնության հավաստագիր դարձած աստվածաշնչյան այս պատգամը:
«Մի հարցնէք, ի՞նչ է, ո՞ր է,
Ուրկէ՞ կու գայ հայու հոգին:
Մեր պապերու հնադարեան դպրութիւնն է ու հին լեզուն,
Ձմեռ բուքին, Նարեկացու վանքի խուցին ճրագն է ան,
Մագաղաթէ հին, հին մատեան տաղարանի
Ու Մեսրոպի գերեզմանին ու երազին
Այբբէնգիմն է Հայու ոգին…»: ՀԱՄԱՍՏԵՂ
Աղոթում ենք և հայցում Բարեսեր Տիրոջ օրհնությունը և առաջնորդությունը՝ այս նվիրական և սուրբ գործի առաքելությունն ի գործ դնելու և պտղաբերելու համար: Ամեն:
Ջերմագին սիրով և օրհնությամբ՝
ՆԱՎԱՍԱՐԴ ԱՐՔԵՊԻՍԿՈՊՈՍ ԿՃՈՅԱՆ
Զորավոր Սուրբ Աստվածածին եկեղեցի