Տասներկու զավակներով հարուստ ընտանիքին ուրախություն էր պատճառել համայնքի այցը

Մարդու սիրտը մի գանձարան է, ուր մարդն իր ազատ ընտրությամբ կարող է կուտակել բարին կամ չարը: Ավետարանում կարդում ենք. «Բարի մարդը իր սրտի բարի գանձից բարիք է հանում, իսկ չար մարդը իր սրտի չար գանձից՝ չարիք» (Մատթեոս 12:35):

Եկեղեցու հայրերից մեկն ասել է. «Շերամի որդն ինքն իրենից մետաքս է հյուսում, իսկ սարդը՝ սարդոստայն: Օձն իրենից ոչ թե մեղր, այլ թույն է դուրս նետում: Այսպես է նաև մարդու պարագայում. բարի մարդն իր բարի սրտից բարիք է արարում, իսկ չար մարդը՝ չարիք: Ունենալ և լինել, դա նույնն է էությամբ»:

Բարձրագույն բարին Աստված է: Ոչինչ այնպես չի մոտեցնում մարդուն Աստծուն, որքան սիրով կատարված բարի գործերը: «Կյանքը կարճ է, և չունենք այն բավարար ժամանակը, որի ընթացքում կկարողանանք ուրախություն պատճառել նրանց, որոնց հետ քայլում ենք կյանքի ճանապարհով: Այդ պատճառով շտապենք սիրել և շտապենք բարին գործել»,- ասել է շվեցարացի գրող Անրի Ֆեդերիկը (19-րդ դար):

Զորավոր Ս. Աստվածածին եկեղեցու սոցիալական ծրագրերի մասնակիցները՝ թե՛ համայնքը և թե՛ աջակից անձինք, փորձում են աստվածատուր իրենց ժամանակն իմաստավորել՝ հնարավորինս մեծ թվով մարդկանց ուշադրություն և սեր բաշխելով: Այդ ուշադրությունից սկիզբ առած ուրախությունն էր տիրում Մելքոնյան բազմազավակ ընտանիքում, որ բնակվում է «Հույսի ավան» թաղամասի 5/71 հասցեում: Դեկտեմբերի 5-ին Զորավոր Ս. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, տնայցով այս կարիքավոր ընտանիքում էր, ուր տասներկու հայորդիներ՝ յոթ տղա և հինգ աղջիկ են դաստիարակվում և մեծանում: Տղաներից երեքը ծառայում են Հայոց ազգային բանակում, մեկին էլ շուտով կզորակոչեն, աղջիկներից երկուսն ուսանում են բարձրագույն հաստատություններում, իսկ մյուսներն էլ դպրոց են հաճախում: Բազմազավակ մայրը՝ Մելքոնյան Կարինեն (44 տ.), 2-րդ խմբի հաշմանդամ է և առողջական խնդրի պատճառով պետք է վիրահատվի ՀՀ ՊՆ Կենտրոնական կլինիկական զինվորական հոսպիտալում: «Ամուսինս ևս առողջական խնդիր ունի և առայժմ ի վիճակի չէ աշխատելու: Ընտանեկան նպաստի և հաշմանդամության թոշակի գումարներով ենք փորձում հոգալ մեր կարիքները: Մեր ընտանիքին ժամանակ առ ժամանակ աջակցում են «Դիակոնիա» բարեգործական հիմնադրամը և ԱՀԹ բարեգործական գրասենյակը»,- ասաց տիկին Կարինեն:

Տեր Գրիգորն ընտանիքի հետ զրույցից հետո բժշկության աղոթք կարդաց և նրանց հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Մելքոնյան ընտանիքն անչափ երախտապարտ էր Զորավոր Ս. Աստվածածին եկեղեցուց, Տեր Գրիգորից և աջակից անձից:

Կարինե Սուգիկյան