Տեառնընդառաջի նախատոնակը Զորավոր Ս. Աստվածածին եկեղեցում

Ս. Ծննդյան և Աստվածհայտնության տոնից քառասուն օր անց՝ փետրվարի 14-ին Հայ եկեղեցին տոնախմբում է Տեառնընդառաջը: Ամեն տարի, փետրվարի 13-ին, հանդիսավոր ժամերգությամբ ազդարարվում է տոնի նախատոնակը:

Այս տարի ևս Զորավոր Ս. Աստվածածին եկեղեցում մեծ թվով հավատավոր հայորդիներ իրենց մասնակցությունն էին բերել հանդիսավոր ժամերգությանը՝ Փրկչին ընդառաջ գնալու կոչին ունկնդիր: Ժամերգության ընթացքում հնչեցին օրվա պատշաճ աղոթքներ և շարականներ: «Համբարձի» շարականի երգեցողությունից հետո բացվեց Սուրբ Խորանի վարագույրը և տեղի ունեցավ նախատոնակ և անդաստան: Ժամերգության ավարտին, եկեղեցական թափորը, հոգևորականների գլխավորությամբ, Քրիստոսին խորհրդանշող Սուրբ Սեղանի կանթեղի լույսով և «Քրիստոս փառաց թագաւոր» տաղի երգեցողությամբ եկեղեցու բակում վառեց Տեառնընդառաջի խարույկը:

Մինչ խարույկը վառելը ներկաները եկեղեցու բակում դիտեցին Տեառնընդառաջի ավետարանական պատմության բեմադրությունը, որ կազմակերպել էին Զորավոր Ս. Աստվածածին եկեղեցու տիկնանց և «Զորավոր» երիտասարդաց միություններն ու կիրակնօրյա դպրոցը: Լուսավոր բեմադրության ավարտին լուսավոր հրեշտակները ներկաներին հիշեցրեցին, որ մեր Փրկիչն է Ճշմարտությունը, Լույսը, Կյանքը, Դուռը, Ճանապարհը, Բարի Հովիվը և Ճշմարիտ Որթատունկը:

Ապա Տեր Վահան քահանա Առաքելյանը Ս. Սեղանի կանթեղի լույսով վառեց Տեառնընդառաջի խարույկը և ներկաներին պատգամեց. «Տեառընդառաջի տոնը հրավեր է յուրաքանչյուրիս Տիրոջն ընդառաջ գնալու, ինչպես որ Սիմեոն ծերունին ընդառաջ գնաց քառասնօրյա մանուկ Հիսուսին և գոհություն հայտնեց Աստծուն, որ արժանի դարձրեց իրեն տեսնելու Օծյալին՝ մարդկության Փրկչին, այնպես էլ, այս տոնի խորհրդով զորացած, հարկ է, որ ընդառաջ գնանք մեր Փրկչին և աստվածային օրհնությունը, սերը և լույսն ունենանք մեր կյանքի, հոգու և էության մեջ: Աստվածային լույսով լուսավորված ապրենք մեր կյանքի օրերը՝ հավատարիմ և ճշմարիտ հետևորդը լինելով մեր Փրկչի: Օգտվելով առիթից՝ շնորհավորում եմ բոլոր նորապսակներին, քանի որ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ Տեառնընդառաջի տոնը հռչակվել է որպես նորապսակների օրհնության օր: Մեր սիրելի՛ նորապսակներ, Աստծո օրհնությամբ և հոգածությամբ ապրեք ձեր կյանքի օրերը և ձեր համատեղ կյանքի ընթացքը թող լինի օրհնաբեր, զավակներ ունենաք և փառավորեք Աստծուն գոհությամբ՝ ձևավորելով քրիստոնյա ամուր ընտանիք՝ հիմնված ազգային և հոգևոր արժեքների վրա»:

Ազգային երգ ու պարով համեմվեց լույսի տոնախմբությունը: Տեառնընդառաջի ավանդական խարույկի շուրջ պարեցին Կենտրոն վարչական շրջանի ենթակայության ներքո գործող «Մանկապատանեկան ստեղծագործության և գեղագիտական դաստիարակության կենտրոն»-ի «Արմենիա» պարային համույթի սաները, իսկ «Տեառնընդառաջ» երգը կատարեցին և պարեցին Կենտրոն վարչական շրջանի մանկապարտեզների երաժշտության դաստիարակները: Կենտրոն վարչական շրջանը, ԱՀԹ-ի հետ համագործակցությամբ, արդեն հինգերորդ տարին է, որ Զորավոր Ս. Աստվածածին եկեղեցու բակում կազմակերպում է Տեառնընդառաջին նվիրված տոնակատարություն:

Զորավոր Ս. Աստվածածին եկեղեցու տիկնանց միության անդամները, ժողովրդական ավանդույթի համաձայն, ներկաներին բաժանեցին աղանձ և սաղմոսներից մեկական համար: Տիկնանց միությունը կազմակերպել էր նաև ցուցահանդես-վաճառք, որտեղ տիկնայք ներկայացրել էին իրենց կողմից պատրաստված տոնի խորհրդանիշ հուշանվերներ:

Տեառնընդառաջը հոգևոր մեծ ուրախություն պարգևեց յուրաքանչյուրին, քանի որ, ըստ Սիմեոն Ա Երևանցի կաթողիկոսի՝ մեր Փրկիչը. «Մարդկության կողմից ընծայվեց որպես մարդ, իսկ Աստծո կողմից՝ Աստված: Որեմն, մենք ամեն տարի փառավորում, օրհնում և տոնում ենք Քրիստոսի գալուստը տաճար, քանի որ մեզ համար բարերարություններ և օգտակարություններ արեց: Ազատեց օրենքի ծանրությունից և տկարությունից՝ կոչելով այն կատարյալ ու թեթև օրենք: Որպես բարձրյալ և անդրանիկ զավակ՝ մեզ ընծայեց Հայր Աստծուն և հաշտեցրեց Նրա հետ: Բացեց Երկնքի դուռը, որ փակված էր մեր առաջ, և հրավիրեց մեզ այնտեղ»:

Կարինե Սուգիկյան