Զոհը

Դառնացած մեծահարուստը գնում է եկեղեցի և հոգևորականին հարցնում.

- Աստված ինձ շնորհ արեց և որդի ունեցա: Սակայն Տիրոջ պարգևած զավակն ինչո՞ւ է վատնում իմ ունեցվածքը, անառակ կյանքով ապրում՝ հսկայական պարտքեր կուտակում և իրեն ու մեզ փորձանքի մատնում:

Հոգևորականը պատասխանում է.

- Հիշո՞ւմ ես՝ ինչքան խնդրեցիր Աստծուց, որպեսզի քեզ զավակ պարգևի և յոթ տարի անց որդի ունեցար: Սակայն նաև հիշո՞ւմ ես, թե ի՞նչ ասացի այն ժամանակ՝ կուռք մի՛ դարձրու երեխային. երբ մեծանա, քեզանից զոհ կպահանջի: Ահա և եկել է զոհաբերության օրը...

Յուրաքանչյուր ներկա հետևանքն է անցյալի և պատճառն ապագայի...

Հովհաննես Մանուկյան