Կտրվի, եթե հակառակ ընթացք չունենալով՝ միշտ ըստ արժանվույն գործադրեն դրանք: Որովհետև շատերը առժամանակ սիրով պատրաստակամ են առաքինական գործերի, բայց որովհետև դրանք հարատևություն չունեն, չեն կարող վարձ ստանալ, ինչպես որ Պողոս առաքյալը հանդիմանում է այդպիսիներին. Հատկապես առավել արժանի են պատժի, քանի որ առաքինության բարիքն իմանալով՝ գործադրելու հոգ չեն տանում: Այսուամենայնիվ, Աստծու ողորմությունից հույսդ մի՛ կտրիր, այլ չար ճանապարհից հետ կանգնելով՝ կարողությանդ չափով միշտ առաքինությա՛ն հետամուտ եղիր, որպեսզի Աստծու շնորհով միշտ գործադրելու կարողություն ունենաս և առատորեն վարձատրվես:
Հիսուսը, վերոհիշյալ ինն առաքինություններն աշակերտներին բացատրելով, նրանց աղի նմանեցրեց և հայտնեց, որ ինչպես որ համը կորցրած աղն իբրև անպիտան բան դեն է նետվում և մարդկանցից ոտնակոխ է լինում, այնպես էլ նրանք, իրենց հատկացված պաշտոնում թերանալու դեպքում, պետք է կորստյան մատնվեն: Ուստի նույն առաքինությունները նախ իրենք պետք է գործադրեին, ապա ուրիշներին ևս սովորեցնելու հոգ տանեին: Այդպես էլ լույսի և լեռան վրա շինված քաղաքի նմանեցրեց առաքյալներին, որպեսզի իմանալով, թե ինչպիսի՛ բարձր պատվի են արդեն արժանացած, ըստ այդմ առաքինական գործերի մեջ անթերի և ամեն կերպ կատարյալ լինեն, և մարդիկ նրանց ու գործերը տեսնելով՝ փառավորեն Աստծուն՝ իրենց երկնավոր հորը:
Արդարև, իրենց տրված պատվերի համաձայն քարոզելով՝ նրանք առաքինության չքնաղ օրինակ եղան ամենքի համար, և մարդկանց սրտերին հոգևոր ճաշակ պարգևելով՝ կռապաշտության խավարի մեջ ապրող ժողովուրդներին Աստծու շնորհած լույսով պայծառորեն լուսավորեցին, որով Աստծու օրհնյալ անունը երկրիս վրա արժանիորեն փառավորեցին:
Թող այստեղ լավ խորհեն բոլոր նրանք, ովքեր ժողովրդի հոգևոր և մարմնավոր իշխան և առաջնորդ են կարգված, որովհետև եթե նրանք իրենց նվիրական պարտականությունն անթերի կատարեն, մեծ ողորմության և փառքի պիտի արժանանան, իսկ եթե պարտականությունների մեջ թերանան, սաստիկ պատժի արժանի պիտի լինեն՝ յուրաքանչյուրն ըստ իր աստիճանի:
Երբ Հիսուսը առաքինությունների գործադրման մասին անհրաժեշտ հրահանգները տվեց առաքյալներին, հին օրենքին հակառակ չընդունվելու համար շտապեց հայտնել, որ ինքը եկել է այն կատարելագործելու և այդ օրենքի ամենափոքր կետն անգամ գործադրելու: Որովհետև հին օրենքը նոր օրենքի միայն պատկերը կամ ստվերն էր (տե՛ս չորրորդ դարի Բ. հարցը), և երկուսը Հիսուսի հրամանն էին բովանդակում. նրա գալստյամբ անթերի պիտի կատարվեին. այդ պատճառով օրենքի ամենափոքր մի կարգավորության դեմ մեղանչողի պատիժն ու օրենքը անթերի պահպանողին փառքն էլ նշանակեց և ցույց տվեց, որ օրենքի նկատմամբ որևէ պատրվակով զանցառություն անելով՝ոչ ոք, ով էլ որ լինի, պատժի չենթարկվի իր սխալ դատողությունների կամ մեկնությունների հետևանքով:
Որովհետև հրեա դպիրներն ու փարիսեցիները, օրենքն ըստ արժանվույն գործադրելու մտադրություն չունենալով, միայն ուրիշներին ուսուցանելու ջանք ու եռանդ էին դրսևորում, այդ պատճառով Հիսուսն առաքյալներին ասում է. «Եթե ձեր առաքինությունը և կամ արդարությունը օրենսգետների և փարիսեցիների առաքինությունը չգերազանցի, չեք կարող Աստծու արքայությունը ժառանգել»: Սրանից թող զգուշանան և երկնչեն նրանք, ովքեր օրենքը կետ առ կետ գործադրելու նկատմամբ անհոգ են ու ծույլ, և ջանում են միայն իրենք իրենց արդարացնելու համար սխալ մեկնություններ տալ և այլոց համար էլ վատ օրինակ ծառայել:
Զորավոր Սուրբ Աստվածածին եկեղեցի