Ասաց դարձյալ հայր Սիսոն. «Ովքեր աշխարհիկ կյանքում մեղանչում են, ակամա բանտարկվում են, նույնպես և մենք պետք է կամավոր արգելափակենք մեզ մեր մեղքերի համար, որպեսզի մեր կամավոր վշտերով փրկվենք հավիտենական տանջանքներից: Եվ եթե պահք պահես, հիվանդություն չես պատճառի քեզ, քանզի ովքեր որկրամոլություն են անում և շատ են ուտում, նրանք ավելի շատ են հիվանդանում: Եթե բարի գործ ես ձեռնարկում, ուրեմն մի՛ ծուլացիր, այլ խնդրիր Տիրոջը, և նա կօգնի քեզ և կտա համբերություն ամեն ինչի մեջ, և քո թշնամիները ամոթով կմնան»: Ասաց դարձյալ հայր Սիսոն. «Ովքեր կամենում են նավել և բազմիցս անցնել բաց ծովը, նրանք ճանաչում են հողմերը, և երբ հասնեն ծովի խորքերը, և հակառակ հողմ հանդիպի, հույսը չեն կտրի և ծովը չեն նետվի, այլ՝ որքան հնարավոր է՝ կջանան նավը պահել և կսպասեն օդի խաղաղվելուն: Այսպես էլ մենք անենք և դիմակայենք փորձություններին, և Քրիստոս կօգնի մեզ»:
«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016
Զորավոր Սուրբ Աստվածածին եկեղեցի