22 Դեկտեմբեր, Հիսնակի Ե Կիրակի
Օգոստոսի 13-ին, Հայ Առաքելական Սուրբ եկեղեցին տոնախմբեց հինգ տաղավար տոներից չորրորդը՝ Վերափոխումն Ս. Մարիամ Աստվածածնի տոնը: Քրիստոնյաներիս համար սիրված տոներից մեկն է, որ մեր Փրկչի՝ Հիսուս Քրիստոսի Ծննդյան, Հարության, Պայծառակերպության տոների հետ միասին կրկին անգամ փրկության և հավիտենական կյանքի ավետիսն է բերում բոլորիս:
Զորավոր Ս. Աստվածածին եկեղեցում տոնական Սուրբ Պատարագը մատուցեց խորհրդակատար Տեր Հայկազուն քահանա Մկրտչյանը, արարողության ավարտին Տեր Հայրը կատարեց խաղողօրհնեքի արարողություն, ապա արարողության մասնակիցներին բաշխվեց օրհնված խաղողի ողկույզներ: Այնուհետև ներկաները եկեղեցու բակում մասնակից դարձան տոնին նվիրված ազգային տոնախմբությանը՝ կազմակերպված Կենտրոն վարչական շրջանի ղեկավար Արա Սադոյանի նախաձեռնությամբ: Ելույթ ունեցավ «Մասունք» ազգագրական երգի-պարի համույթը, որի կատարմամբ տոնախմբության մասնակիցները դիտեցին Աստվածամոր տոնին նվիրված «Աստվածածնա պար»-ը և այլ պարերգեր: Ապա ներկաները, միանալով «Գյովնդ» շուրջպարին, դարձան տոնախմբության անմիջական մասնակիցները: Ազգային երգ ու պարով համեմված տոնախմբության ավարտին խորհրդակատար Տեր Վահան քահանա Առաքելյանը շնորհավորեց ներկաներին տոնի կապակցությամբ: «Ս. Կույսի տոնը սիրելի տոն է մեզ համար, քանի որ Տիրամոր բարեխոսությանը դիմում ենք այն հավատքով և վստահությամբ, ինչպես կդիմեինք մեր մայրերին, վստահաբար, այն գիտակցումն ունենալով, որ Տիրամայրը միշտ ունկնդիր է մեր խնդրանքներին և բարեխոս իր միածին Որդու առջև: Թող Տիրամոր բարեխոսությամբ Տերը պահպանի բոլորին իրենց ընտանիքների հետ միասին»,- ասաց Տեր Հայրը և իր շնորհակալությունը հայտնեց տոնախմբության կազմակերպչին՝ Կենտրոն վարչական շրջանին, որ եկեղեցական տոնին ազգայինը միախառնելով, ներկաներին հաղորդ դարձրեց ազգային արժեքներին:
Տոնախմբության մասնակիցներին պարուրել էր հոգևոր ուրախությունը, քանի որ Ս. Գրիգոր Տաթևացու խոսքի համաձայն. «Այսօր Աստվածածինը վերափոխվեց՝ մշտապես կենդանի մնալով, քանզի ճաշակեց անմահության բաժակը և մշտապես մեզ համար բարեխոս է իր միածին Որդու մոտ»:
Կարինե Սուգիկյան
Զորավոր Սուրբ Աստվածածին եկեղեցի