Ս. Պողոս առաքյալը գերագույն պատվիրանը համարում է սերը, անարատ սրտից, մաքուր խղճմտանքից և անկեղծ հավատքից բխած սերը (Ա Տիմոթեոս 1:5): «Ի՞նչ սիրո մասին է խոսում առաքյալը: Անկեղծ սիրո մասին, որ չի սահմանափակվում միայն խոսքերով, այն բխում է հոգուց, բարի հայեցողությունից և կարեկցանքից»,- մեկնում է Ս. Հովհան Ոսկեբերանը:
Իրապես, մարդկային պատմությունը վկայում է, որ ճշմարիտ սերը լիացնում է սիրտը, սիրում է անշահախնդիր, չի սահմանափակվում միայն զգացմունքով, այլ շտապում է գործել: Մինչ սերը, որի հիմքում եսասիրությունն է, շատ կարճ է ապրում, քանի որ պատրաստ չէ զոհողության:
Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, սոցիալական ծրագրերի շրջանակներում, կյանքի է կոչում գերագույն պատվիրանը՝ օգնության ձեռք մեկնելով կարիքավոր ընտանիքներին:
Օգոստոսի 10-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը Ավագյան Էլիզային (65 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Էլիզան երկու որդի և մեկ դուստր ունի: «Ամուսինս երկար տարիներ է, ինչ լքել է ընտանիքը: Աղջիկս ինը տարի առաջ ընտանիք էր կազմել, բայց այժմ ամուսնալուծվել է և իր դստեր և մյուս տղայիս հետ ապրում են առանձին, վարձակալությամբ: Ես մյուս որդուս՝ Մորիսի (24 տ.) հետ, բնակվում եմ Վարդաշեն 6-րդ փողոցի 68/415 հասցեում գտնվող հանրակացարանում, որ անմխիթար վիճակում է: Տղաս մանկուց հաշմանդամ է. աչքի հետ կապված խնդիր ունի, մյուս աչքն էլ վնասվեց, կորցրեց տեսողությունը, մեկ անգամ վիրահատեցին, երկրորդ վիրահատության կարիքը կա, բայց մենք ի վիճակի չենք վճարելու»,- ասաց տիկին Էլիզան: Ընտանիքի մայրն առողջական խնդիրների պատճառով չի աշխատում, իսկ նրա հաշմանդամ որդու հասանելիք հաշմանդամության գումարը տասնմեկ տարիների ընդհատումից հետո դեռ նոր պետք է տրամադրեն: Ֆինանսական խնդիրների պատճառով ընտանիքը հայտնվել է մի շարք դժվարությունների առջև. հոսանքի վարձը չվճարելու պատճառով մեկ ամիս է, ինչ բնակարանը հոսանքազրկել են:
Տիկին Էլիզան անչափ շնորհակալ էր Տեր Գրիգորից և աջակից անձից իր ընտանիքի հանդեպ ցուցաբերած ուշադրության և հոգատարության համար:
Կարինե Սուգիկյան
Զորավոր Սուրբ Աստվածածին եկեղեցի