Հուլիսի 24-ին Զորավոր Սբ. Աստվածածին եկեղեցու «Զորավոր» երիտասարդաց միությունը, հոգևոր պատասխանատու Գևորգ սրկ. Համբարձումյանի գլխավորությամբ, մեկնեց ուխտագնացության Ծաղկաձորի Կեչառիս և Մեղրաձորի Թեժառույգի վանական համալիրներ: Վաղ առավոտյան երիտասարդները միասնաբար աղոթեցին Զորավոր Սբ. Աստվածածին եկեղեցուն կից Սբ. Անանիայի մատուռ-դամբարանում, որտեղից և շարունակեցին աղոթքի իրենց ուղին, որ նվիրված էր Հայոց աշխարհի խաղաղությանը և հիվանդ երեխաների ապաքինմանը: Երիտասարդ ուխտավորները, հասնելով Ծաղկաձորի Կեչառիս միջնադարյան վանական համալիր, մասնակից եղան Սբ. Պատարագին համալիրի գլխավոր Սբ. Գրիգոր Լուսավորիչ եկեղեցում: Երիտասարդաց միության անդամներից չորս տղաներ իրենց մասնակցությունը բերեցին Սբ. Պատարագին՝ շապիկ հագնելով և Սբ. Խորան բարձրանալով: Առանձնահատուկ օրհնություն է ուխտավայրում մասնակից լինելը Հայ եկեղեցու սրբազան խորհրդին՝ Սբ. Պատարագին՝ հաղորդվելով Քրիստոսի Մարմնին և Արյանը: Օրհնաբեր այդ վայրում երիտասարդները աղոթքի կանգնեցին նաև վանական համալիրի մյուս եկեղեցիներում, մատուռներում: Ապա երիտասարդ ուխտավորները շարունակեցին իրենց ուխտուղին՝ մեկնելով Թեժառույգի վանական համալիր, որտեղ միասնաբար աղոթեցին և «Տեր ողորմեա»-ն երգեցին:
Մեղրաձորի գեղեցկատեսիլ բնության գրկում երիտասարդները սիրո ճաշ ունեցան և վայելեցին աստվածատուր բնության ներդաշնակությունն ու բազմազանությունը: Սբ. Պաիսիոս Աթոսացու խոսքի համաձայն՝ բնության մեջ, որ կողմ էլ նայես, ամենուր կտեսնես Աստծո իմաստությունն ու վսեմությունը:
Եկեղեցու սկզբնավորման առաջին իսկ օրից Քրիստոսի անվանակիցների՝ քրիստոնյաների հոգևոր ուղու մշտական մի ընթացքն է եղել ուխտագնացությունը: Ամեն անգամ ուխտավորն, առնչվելով սրբություններին, նորանոր բացահայտումներ է ունենում, զորանում է, նորոգվում՝ ապրելով աստվածապարգև իր կյանքը:
Տերունական այս օրը «Զորավոր» երիտասարդաց միության անդամները, ևս առնչվելով մեր սրբավայրերին, իրենց աղոթքի ուղով ընթացան դեպի Կյանք: Քանի որ. «Եկեղեցին մահ չի տալիս, այլ կյանք հավիտյան, գերազա՛նց է, քան բանականները, անշնչությամբ էլ իր մեջ Նա ունի հրաշագործում, երբ՝ խորհուրդների կատարումներն է արդեն ընձեռում: Նա հաստատում է նորոգությունը՝ վերստին մեր մեջ կենդանացնելով կերպարանքը սուրբ փառքերի՛ Լույսի: Եվ Նա Տապանն է ինձ մաքուր պահող, և կրկնակի՛ է ինձ երջանկացնում ու պահպանում ինձ՝ կյանքիս հեղձուցիչ ալիքների մեջ»,- ասել է Սբ. Գրիգոր Նարեկացին իր «Մատյան Ողբերգության» աղոթամատյանում (Բան ՀԵ):
Կարինե Սուգիկյան
Զորավոր Սուրբ Աստվածածին եկեղեցի