Հուլիսի 27-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանն այցելեց վիրավոր ազատամարտիկ Նելսոն Ղոջիկյանին (65 տ.), ով տասը օրից ավել է, ինչ ստացիոնար բուժում է ստանում «Արմենիա» հանրապետական բժշկական կենտրոնում: Արցախյան հերոսամարտի մասնակից ազատամարտիկը վիրավորվել է գլխից և ոտքից: Ազատամարտիկի որդին՝ Սերգեյ Ղոջիկյանը (38 տ.), նշեց, որ հայրը բուժում է ստացել նաև Մոսկվայում, ոտքն ամպուտացիա է արված, անկողնային հիվանդ է և տարիների ընթացքում նրա մոտ առողջական այլ խնդիրներ են առաջ եկել, նա սրտային անբավարարություն և հեպատիտ B հիվանդությունն ունի, որովայնում հեղուկ է կուտակվում և ժամանակ առ ժամանակ հիշողության կորուստ է ունենում:
Վեց հոգուց բաղկացած Ղոջիկյան ընտանիքը բնակվում է Մալաթիա-Սեբաստիա վարչական շրջանի 30-Ա շ. 34/2 բն. հասցեում: Ընտանիքն այժմ հայտնվել է ֆինանսական դժվարության մեջ. երեք ամիս է, որ երկրորդ խմբի հաշմանդամ, բազմաթիվ պարգևների արժանացած Նելսոն Ղոջիկյանը թոշակ չի ստանում, իսկ ընտանիքի միակ աշխատողը՝ ազատամարտիկի որդին, ով տասնչորս տարի որպես իրավաբան է աշխատել, մեկ ամիս է, ինչ գործազուրկ է:
«1993 թ-ից հայրիկիս նշանակել էին անժամկետ երկրորդ խմբի հաշմանդամության թոշակ և ըստ օրենքի՝ եթե անձը տասը տարուց ավել հաշմանդամության կարգ ունի, ապա այն վերանայման կարիք չունի: Այս երեք ամիսների ընթացքում ստիպված եղանք նորից թղթաբանությունը վերանայել, որպեսզի վերականգնենք հայրիկիս հասանելիք հաշմանդամության թոշակը, օգոստոս ամսին նա արդեն թոշակ կստանա: Բացի այդ տասնհինգ տարի է, որ հայրս դեռ բնակարանային հերթի մեջ է, քանի որ մեր փոքր բնակարանային պայմաններում և իր հիվանդության պարագայում իրեն առանձին խնամք է անհրաժեշտ»,- ասաց Սերգեյը:
Տեր Գրիգորը զրույցից հետո բժշկության աղոթք կարդաց և ազատամարտիկին հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Վիրավոր ազատամարտիկն իր գոհունակությունը հայտնեց Տեր Գրիգորին և աջակից անձին՝ ուշադրության և հոգածության համար:
Մարդուն՝ որպես արարչագործության պսակի, սիրտը տրվել է սիրելու համար, սիրով է ապրում քրիստոնեական հոգին, սիրո մեջ է նրա երջանկությունն ու երանությունը: Սիրո առաքյալը՝ Հովհաննես ավետարանիչը, ասում է, որ Աստված սեր է և ով մնում է սիրո մեջ, նա միացած է մնում Աստծուն, և Աստված էլ՝ միացած նրան (Ա Հովհ. 4:16):
«Երանելի է մարդը, որն իր մեջ ունի Աստծո սերը, որովհետև նա իր մեջ Աստծուն է կրում: Ում մեջ սեր կա, նա Աստծո հետ միասին վեր է ամեն ինչից» (Ս. Եփրեմ Ասորի):
Կարինե Սուգիկյան
Զորավոր Սուրբ Աստվածածին եկեղեցի