19 Մարտ, Գշ, Մեծ պահքի ԼԷ օր

Գրքեր

Ընտրություն

Երջանկություն փնտրող դերձակը թագավորական կնիքով թանկարժեք մատանի է գտնում: Անչափ ուրախանում է: Քիչ հեռվում տեսնում է` մի խումբ մարդիկ զառեր խաղարկելով և դրանց թվերը ճիշտ կանխատեսելով դրամ են վաստակում: Նրանցից մեկը մեծ խաղագումարներ էր ձեռք բերում: Դերձակը որոշում է մասնակցել և թանկարժեք մատանին խաղարկության մեջ դնել` շատ դրամ վաստակելու ակնկալիքով:

Ազնվականի հագուստով մեկն ասում է նրան.

-Տեսնում եմ, որ օտարական ես, սակայն քեզ բարեկամ պիտի համարեմ, քանի որ թագավորական կնիքով մատանի ունես: Արդ, խորհուրդ եմ տալիս, որ այս խաղի մեջ չմտնես. տանուլ կտաս և մատանին, և ունեցածդ ամբողջ դրամը: Այժմ պետք է ընտրություն կատարես` կամ խաղալ, կամ այստեղից ինձ հետ հեռանալ...:

Դերձակը մի ակնթարթ նայում է խաղով ոգևորությամբ տարված մարդկանց և որոշում միանալ նրանց: Այդ ընթացքում պարտվում է` և կորցնում մատանին, և իր ամբողջ գումարը: Այնուհետև իրեն խորհուրդ տվող մարդուն դժգոհությամբ ասում.

-Ինձ կոչեցիր բարեկամ, սակայն հենց սկզբից հաջողություն չմաղթեցիր այս խաղում ու լավատես չեղար իմ ընտրության համար: Ուստի, դու ինձ բարեկամ չես, այլ` թշնամի…

Ազնվականի հագուստով մարդը պատասխանում է.

-Քո գտած մատանու տերն եմ` թագավորն այս երկրի: Իսկ խաղում հաջողակ մարդն իմ աճպարարն է, որ ճարպկությամբ բոլորին հիմարացնում է և հաղթում: Այժմ քո բարեկա՞մն եմ, թե՞ թշնամին…

Երբ տեղին է և չես ընտրում, նշանակում է` կորցնում ես, երբ տեղին չէ ու ընտրում ես, կրկին նշանակում է` կորցնում ես…

Հաճախ մարդիկ Աստծու խորհուրդները և պատգամներն անտեսում են` գնալով իրենց ցանկությունների ետևից և բարեկամ համարելով իրենց ցանկությունները…

 

 Հովհաննես Մանուկյան

28.07.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․