Հինանց շրջանի երրորդ Կարմիր կիրակի օրը «Զորավոր» երիտասարդաց միությունը Զորավոր Ս. Աստվածածին եկեղեցում մասնակցեց Սուրբ և Անմահ Պատարագի, ապա մեկնեց ուխտագնացության Հովհաննավանք: Ավանդույթի համաձայն՝ Կարմիր կիրակի օրը այս սրբավայր է բերվում Մշո Ս. Առաքելոց վանքի Կարմիր Ավետարանը: Ի թիվս այլ ուխտավորների՝ երիտասարդաց միության անդամները ևս հաղորդակից դարձան Ավետարանից բխող զորությանը: Ապա, վանքի հոգևոր հովիվ Տեր Արամ քահանա Ասատրյանի առաջնորդությամբ, միասնաբար աղոթեցին՝ սբ. Հովհաննես Մկրտչի բարեխոսությունը հայցելով: Տեր Հայրը բարեմաղթանքներ հղեց երիտասարդներին՝ ցանկանալով, որ միշտ հոգով երիտասարդ մնան, իրենց առաքելության մեջ զորանան ու բարի պտուղներ տան ի փառս Աստծու և հայրենիքի: Սիրո ճաշով եզրափակվեց «Զորավոր» երիտասարդաց միության ուխտի օրը:
Յուրաքանչյուր քրիստոնյայի համար Քրիստոսահիմն եկեղեցին սուրբ վայր է, սուրբ ոչ միայն այնտեղ անցկացվող աղոթքի և ծեսերի պատճառով, այլ, որ այնտեղ Ամենաբարձրյալի բնակության վայրն է՝ Աստծու տունը: Այդ պատճառով յուրաքանչյուր քրիստոնյա երկյուղածություն և հատուկ ակնածանք ունի եկեղեցու նկատմամբ: Ակնածալից զգացումը այն վայրերի հանդեպ, ուր Տերը ցույց է տվել Իր ներկայությունը մարդկանց, մեկ անգամ չէ, որ պատկերված է Հին Կտակարանում: Մովսես մարգարեն, տեսնելով վառվող, բայց չայրվող մորենին, կամեցավ մոտենալ՝ ուսումնասիրելու հրաշքը, և լսեց Աստծու ձայնը. «Մի՛ մոտեցիր այստեղ: Կոշիկներդ հանի՛ր քո ոտքերից, որովհետև այն վայրը, ուր կանգնած ես դու, սուրբ հող է» (Ելք 3:5)։ Եթե Տերը պահանջում էր այդպիսի հարգանք և ակնածանք այն վայրերի նկատմամբ, ուր ժամանակավոր էր ներկա գտնվել, ապա Նա շատ ավելի հարգանք և ակնածանք է պահանջում եկեղեցու նկատմամբ, որ Իր տունն է:
Եկեղեցու հանդեպ ակնածանքի մեծագույն զգացում ցուցաբերուց զատ, քրիստոնյան ակնածանքով է վերաբերվում տաճարի բոլոր սրբություններին՝ Տիրոջ Մարմնին ու Արյանը խորհրդանշող Հացն ու Գինուն, Սուրբ մյուռոնին, Սուրբ Խաչին, Սուրբ Ավետարանին, սրբապատկերներին, Քրիստոսին, Աստվածամորը և մյուս սրբերին պատկանող կամ նրանց դիպած իրերին, տաճարի սրբազան սպասքին: Քրիստոնյայի համար բոլոր սրբությունները ծառայում են որպես փրկության գործիք: Նա, պատվելով Սուրբ Խաչը, սրբապատկերը, Ավետարանը կամ այլ սրբազան առարկաներ, իր միտքն ուղղում է դեպի Աստված և սրբերը:
Կարինե Սուգիկյան
Զորավոր Սուրբ Աստվածածին եկեղեցի