Համբերություն

Մի իշխան մեկը մյուսի ետևից երեք մարդու է վարձում, որպեսզի իր ծերունի հորը խնամեն: Առաջինը երեք օրից ավելի չի դիմանում և հեռանում է, երկրորդը յոթ օրից ավելի չի համբերում և փախչում է, իսկ երրորդը շարունակում է խնամել: Հետաքրքրությամբ լցված իշխանը հարցնում է երրորդին.

- Ամեն գիշեր սպասում եմ, որ համբերությունդ կհատի և ինքդ էլ ջրով լի բաժակը բարկացած կշրխկացնես գետնին ու կհեռանաս, որովհետև ծերունի հայրս ամբողջ գիշեր տասնհինգ րոպեն մեկ գալիս, արթնացնում ու ջուր է ուզում, սակայն ինչ եկել ես, գիշերները խաղաղ լռություն է տիրում:

Մարդը պատասխանում է.

- Ճիշտ եք, Ձեր ծերունի հայրն ամեն գիշեր պարբերաբար ինձ արթնացնում է և ջուր ուզում, իսկ ես գոհություն եմ հայտնում Աստծուն, վերցնում եմ աղոթագիրքը և շարունակ, բարձրաձայն սաղմոսները կարդում: Եվ ծերունին հոգևոր կյանքի ջրով հագենալով՝ խաղաղությամբ ննջում է, ինքս էլ Աստծուն կրկին գոհություն եմ հայտնում և հանգիստ քնում:

Հովհաննես Մանուկյան