Հավատք

Մի իտալացի քանդակագործ մտախոհ պտտվում է մի հսկա քարի շուրջ: Նրան է մոտենում մի քահանա և հարցնում, թե ինչ է պատահել:

Քանդակագործն ասում է.

- Ես ամբողջ սրտով հավատում եմ Աստծուն ու հիշում, որ Ավետարանում ասվում է, եթե նույնիսկ մանանեխի հատիկի չափ հավատ ունենաք, ապա կարող եք լեռներ տեղափոխել:

Եվ ահա ուզում եմ այս քարը տեղափոխվի իմ արհեստանոց և Աբրահամի հոյակերտ քանդակը պատրաստեմ: Սակայն ինչքան հավատով ասում եմ ու մեծ հավատքով հավատում, այս քարը նույնիսկ իր տեղից չի ցնցվում...

Քահանան պատասխանում է.

- Քեզ ոչ թե մեծ հավատք է անհրաժեշտ, որպեսզի քարեր տեղափոխես այդ հավատքի շնորհիվ, այլ Աբրահամի նման ունենալ անսահման վստահություն ու մեծ հավատք առ Աստված... Իսկ դու կատարյալ կերպով վստահում և հավատո՞ւմ ես Քրիստոսին, եթե նույնիսկ չի ստացվում լեռներ տեղափոխել...

Աստված ակնկալում է, որպեսզի մենք ձգտենք ունենալ ոչ թե մեծ հավատք լեռներ տեղափոխելու համար, այլ ունենալ մեծ հավատք հենց Իր նկատմամբ:

Հովհաննես Մանուկյան