23 Դեկտեմբեր, Բշ
2015թ-ի հունիսի 23-ին Զորավոր Սուրբ Աստվածածին եկեղեցու բակում կայացավ եկեղեցու հոգևոր հովիվ Տեր Գրիգոր քահանա Գրիգորյանի հանդիպումը Տիկնանց միության անդամների հետ: Հանդիպմանը ներկա և մասնակից էին նաև ներկայացուցիչներ եկեղեցու Ծխական խորհրդից:
Տիկնանց միությունն արդեն մեկ տարի է, որ կազմավորվել և իր գործունեությունն է ծավալել: Իհարկե, առայժմ միայն շատ նախաձեռնությունների հիմքերն են գցվում, բայց դատելով արդեն կատարված գործերից՝ վիրավոր զինվորների բուժման հարցեր, այցելություններ ծերանոցներ, հոգևոր տոներին նվիրված միջոցառումներ և ներկայացումներ, կիրակնօրյա դպրոց, ուխտագնացություններ և այլն, դժվար չէ պատկերացնել, որ մնացյալներն էլ լինելու են սրտացավ և հոգեշահ, ուղղված ոչ միայն համայնքի ներքին խնդիրները լուծելուն, այլ նաև ժողովրդի ընդհանրական կարիքները հոգալուն, եկեղեցու և ժողովրդի կապն ավելի սերտացնելուն և որ «հունձքն առատ է լինելու»…
Տեր հայրը հավաքն սկսեց աղոթքով… Եկեղեցու բակի գլուխ-գլխի տված և շեկլիկ պտուղներով ծանրաբեռ ծիրանենիների շուքի տակ ՚խմբված հավատացյալները «Հայր մեր»-ի մրմնջոցի հետ ասես նաև առ երկինք առաքեցին Աստծուն ծառայելու իրենց պատրաստակամությունն ու հաստատակամությունը, և, վստահաբար, ստացան նաև օրհնության հեղումը երկնային հեռուներից: Ասում եմ՝ վստահաբար, որովհետև սիրո և խաղաղության այն լույսը, որ առկա էր բոլորի աչքերում, հուշում էր երկնային էակների ներկայությունն ինչ-որ տեղ շատ մոտիկ:
Տեր Գրիգորը շնորհակալություն հայտնեց Տիկնանց միության մինչ այժմ արված աշխատանքների համար, որոշ առաջարկներ և լրացումներ արեց Զորավոր եկեղեցու ատենապետուհի Սաթենիկ Սիմոնյանի ներկայացրած գործունեության ծրագրում ընդգրկելու համար:
Ծրագիրն իր մեջ ներառում է Տիկնանց միության նպատակները, անդամների ցանկը, աշխատանքային տարբեր խմբերը (հոգևոր և մշակութային միջոցառումներ կազմակերպող, եկեղեցու «Զորավոր» պարբերականի հրատարակման, ուխտագնացությունների կազմակերպման, վիրավոր զինծառայողներին աջակցության, ծերանոցներ այցելության, առողջապահական, իրավաբանական խորհրդատվությունների, կիրակնօրյա դպրոցի և այլն), խմբերի գործունեության առաջիկա քայլերը, պատասխանատուներին:
Ծրագրի օրինակները բաժանվեցին ներկաներին՝ քննարկման և լրացումների համար:
Սաթենիկ Սիմոնյանը ուրախությամբ նշեց, որ խորհրդում ընգրկվածները նվիրյալներ են իրենց գործում և հենց դա է իրենց գործունեության արդեն գրանցված արդյունքների հիմնական պատճառը:
Տեր հայրն էլ հաստատեց, որ համայնքը համախումբ է և Աստծուն ծառայելու գործում նախանձախնդիր, իսկ «հանուն Աստծո արված ամեն գործ անպայման ունենում է իր վարձքը»:
Նանե
Զորավոր Սուրբ Աստվածածին եկեղեցի