Հոգու անոթը

Մի եղբայր ծերին հարցրեց.

- Հա՛յր, հաճախ եմ Սուրբ Հայրերին խնդրում, որպեսզի հոգուս փրկության համար խրատներ տան ինձ, բայց ոչինչ չեմ հիշում նրանց ասածներից:

Ծերը եղբորն ասաց.

- Երկու դատարկ կուժ ունեմ, գնա դրանցից մեկը վերցրո՛ւ, ջուր լցրու մեջը, լվա՛, ջուրը թափի՛ր, իսկ անոթը շրջի՛ր և իր տեղը դի՛ր:

Եղբայրը կատարեց այդ հանձնարարությունը: Ծերը ևս երկու անգամ խնդրեց նույնն անել: Երբ կուժն արդեն երրորդ անգամ էր լվացվել, ծերն ասաց.

- Երկու անոթներն էլ այստեղ բե՛ր:

Այնուհետև հարցրեց.

- Այս երկուսից ո՞րն է ավելի մաքուր:

- Այն, որի մեջ ջուր էի լցնում և լվանում,- պատասխանեց եղբայրը:

- Այդպես էլ այն հոգին է, որդյա՛կ, որը հաճախ է Աստծո խոսքը լսում: Թեկուզ ոչինչ չի մտապահում իր լսածից, բայց ավելի է մաքրվում, քան այն հոգին, որը երբեք Աստծո խոսքը չի խնդրում և չի լսում:

Ռուսերենից թարգմանությունը՝ Էմիլիա Ապիցարյանի