Իրական երջանկության ձգտման ճանապարհին

Աստծո որդեգիր դարձած անձինք կոչված են Նրա սիրո, գթության և քաղցրության արտացոլումը լինել իրենց միջավայրում: Աստծո հանդեպ իրական սերն արտահայտվում է զոհողությամբ:

Աստված մարդուն արարել է երջանիկ լինելու համար: «Երջանկության ամենաստույգ ուղին երջանիկ լինելու ցանկության մեջ չէ, այլ նրա, թե ինչպես երջանկացնել ուրիշներին: Ինչի համար անհրաժեշտ է նկատել մարդկանց կարիքները, հոգ տանել, օգնել և սիրել նրանց խոսքով և գործով և որքան հաճախակի արտահայտվի այդ սերը, այնքան առավել իրական կդառնա երջանկությունը»,- ասել է գերմանացի բժիշկ, գիտնական Ֆ. Պ. Գաազը, ում մեծամասնությունը համարել է «Սուրբ բժիշկ» և «Աստծո մարդ»: Իսկ բարեպաշտ և հայտնի բժիշկ Ի. Ի. Պիրոգովը վստահեցնում է. «Երջանիկ լինել ուրիշների երջանկությամբ, դա է իրական երջանկությունը և երկրային կյանքի իդեալը»:

Իրական երջանկության ձգտման ճանապարհին՝ Զորավոր Սբ. Աստվածածին եկեղեցու համայնքը՝ հոգևոր հովիվ Տեր Գրիգոր քահանա Գրիգորյանի գլխավորությամբ և ամերիկաբնակ Կարեն Վարդանյանի աջակցությամբ, մարտի 2-ին այցելեց սիրիահայ Պողարյան ընտանիքին: Կոմիտաս 28, բնակարան 30 հասցեում վարձակալությամբ բնակվող ընտանիքը բաղկացած է հինգ հոգուց: Ընտանիքի հայրը՝ 65-ամյա Սարգիս Պողարյանը, սիրտ-անոթային հիվանդություն ունի, չի աշխատում և խնամում է իր 23-ամյա մտային թերզարգացած որդուն: Նրա կինը՝ 58-ամյա Պայծառ Քերաջյանը, նոր է անցել աշխատանքի: Սարգիս Պողարյանի մյուս որդին, ընտանիքին օգնելու նպատակով, ստիպված է եղել մեկնել արտագնա աշխատանքի:

Տեր Գրիգորը բժշկության աղոթք կարդաց և ընտանիքին հանձնեց հիգիենայի և անկողնային պարագաներ, սննդի փաթեթներ: Սիրիահայ ընտանիքն իր շնորհակալությունը հայտնեց Տեր Գրիգորին, Զորավոր Սբ. Աստվածածին եկեղեցու համայնքին և իրենց աջակից անձանց:

Իրական երջանկության ուղին այլ ուղի չէ, եթե ոչ ողորմության, որի ընթացքում ինչպես առակագիրն է ասում, անձն ողորմությամբ և հավատքով մաքրվում է իր մեղքերից (Առակներ 15:27):

Կարինե Սուգիկյան