Սեպտեմբերի 11-ին Հայաստանյաց Առաքելական Սուրբ եկեղեցին նշեց հինգ տաղավար տոներից Խաչվերացը: Զորավոր Ս. Աստվածածին եկեղեցում տոնական Սուրբ Պատարագը մատուցեց հոգևոր հովիվ Տեր Գրիգոր քահանա Գրիգորյանը: Ս. Պատարագի ավարտին համայնքը, Տեր Գրիգորի առաջնորդությամբ, ուխտի մեկնեց Սաղմոսավանք: Սրբավայրում ուխտավորները մասնակցեցին խաչքարի օծման արարողությանը, որն իրականացվեց Արագածոտնի թեմի առաջնորդ Տ. Մկրտիչ եպիկոսպոս Պռոշյանի ձեռամբ: Սաղմոսավանքի բակը զարդարող խաչքարը կանգնեցվել էր Զորավոր Ս. Աստվածածին եկեղեցու համայնքի անդամ Արամ Ֆրանկյանի բարերարությամբ՝ ի հիշատակ Արցախի գոյամարտում նահատակված մեր քաջարի զինվորների: Ասեղնագործ նրբությամբ քանդակված խաչքարը քարգործ վարպետ Պողոսի կերտած Գոշավանքի խաչքարի (13-րդ դ.) կրկնօրինակն է, իսկ խաչքարագործ վարպետներն են՝ Արամ Բաբայանը և Օշականի Ս. Մեսրոպ Մաշտոց եկեղեցու հոգևոր հովիվ Տեր Վազգեն քահանա Հովհաննիսյանը:
Խաչքարի օծման հանդիսավոր արարողության ավարտին Սրբազան Հայրն անդրադարձավ Սուրբ Խաչի խորհրդին, ապա շնորհավորեց ներկաներին և իր գնահատանքի խոսքն ուղղեց Ֆրանկյան ընտանիքին՝ Սաղմոսավանքի բարեզարդությանն ուղղված բոլոր ներդրումների համար: Այնուհետև ներկաներին և ուխտավորներին Ֆրանկյան ընտանիքի կողմից մատաղ բաժանվեց:
Հայոց աշխարհի հազարավոր խաչքարերի թվին ավելացավ ևս մեկը, որը հայի ինքնության ամենաբնութագրական խորհրդանշաններից մեկն է: Զաքարիա կաթողիկոսն աստվածընկալ Սուրբ Խաչին նվիրված իր ճառում ասել է. «Բարեբանվա՛ծ ես, ամենօրհնյա՛լ Սուրբ Խաչ, քանզի քո մասին ասաց Սողոմոնը. «Կյանքի ծառ է նրանց համար, ովքեր իրենց հույսը նրա վրա են դնում և ապավինում նրան, ինչպես Տիրոջը» (Առակ. 3:18), այլև՝ «Օրհնված է այն ծառը, որով եղավ Աստծու փրկությունը» (հմմտ. Իմաստ. Սողոմոնի 14:7)»։
Կարինե Սուգիկյան
Զորավոր Սուրբ Աստվածածին եկեղեցի