Գրքեր

Փոթորիկ

Մի նավ ծովի հուժկու ալիքների վրա տարուբերվում է: Անսանձ քամին ու կլանող ալիքները նավը քշում-տանում են դեպի մոտակա ժայռոտ ցամաքը: Մի նավաստի տախտակամածի վրա տագնապահար այս ու այն կողմ է վազում, այնուհետև իրեն նետում ալեկոծ ծովի ալիքների մեջ և ավելի տագնապահար օգնություն հայցում: Երբ մյուս նավաստիները նրան փրկում են ու կրկին նավը բարձրացնում, նրանցից մեկը հարցնում է, թե ինչու իրեն նետեց ծովը: Ամբողջովին թրջված ու ցրտից սարսռած մարդը պատասխանում է.

- Երբ առաջին անգամ տեսա հանդարտ ծովը և արեգակի ճառագայթներից փայլփլող մեղմ ալիքները, հասկացա, որ իմ կոչումն էլ է ձեզ նման լինել ու ցանկացա նավաստի դառնալ և ամեն նավարկության վերադարձից հետո մարդկանց գովասանքին ու գնահատանքին արժանանալ: Սակայն երբ տեսա այս փոթորիկը և նավի ահռելի ընթացքը դեպի ժայռը, ինձ նետեցի ծովի մեջ, որպեսզի փրկվեմ:

Մյուս նավաստիներից մեկը պատասխանում է.

- Եղբա՛յր, մի՞թե չես վստահում մեր փորձառու նավապետին: Ամբողջությամբ վստահի՛ր նրան և ողջ-առողջ կհասնես քո նավարկության հանգրվանին:

Երբեմն մարդկանց թվում է, թե քրիստոնյա դառնալով իրենք Աստծուն մեծ ծառայություն են մատուցում և պիտի արժանան խաղաղ ու հանգիստ և հաջողություններով լեցուն կյանքի, որոնց միջոցով նույնիսկ հոգևոր առաքելություն պիտի իրագործեն այս աշխարհում: Սակայն մարդիկ մոռանում են, որ քրիստոնյայի կյանքը խաչի ճանապարհ է և հարկ եղած դեպքում պետք է խոնարհությամբ ու համբերությամբ տանել այդ խաչը ու հանուն Քրիստոսի նաև հարմարվել խաչի ծանրությանը` իրապես իրականացնելու հոգևոր առաքելություն այս աշխարհում: Իսկ Աստծուց տրված խաղաղությունը կամ խաղաղ կյանքը զորության ներկայություն է, բայց ոչ նեղության բացակայություն...

 

Հովհաննես Մանուկյան

02.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․