Մասունքակիր մեծ ձեռաց Խաչի օծում Զորավոր Սբ. Աստվածածին եկեղեցում

Դեկտեմբերի 24-ին Զորավոր Սբ. Աստվածածին եկեղեցում երեկոյան ժամերգությունն անցկացվեց ԱՀԹ առաջնորդական փոխանորդ գերաշնորհ Տեր Նավասարդ արքեպիսկոպոս Կճոյանի հանդիսապետությամբ: Ժամերգության ավարտին Սրբազան Հոր ձեռամբ օծվեց մասունքակիր արծաթյա մեծ ձեռաց Խաչը, որ գործածվելու է Սբ. Պսակադրության արարողության ժամանակ: Խաչի նվիրատուն Զորավոր Սուրբ Աստվածածին եկեղեցու համայնքի անդամ Ժաննա Ղազարյանն էր:

Արարողության ավարտին Սրբազան Հայրը, ողջունելով ներկաներին, նախ իր գնահատանքը հայտնեց Զորավոր Սուրբ Աստվածածին եկեղեցու հոգևոր հովիվ Տեր Գրիգոր քահանա Գրիգորյանին, նշելով, որ նրա հովվության շրջանում բարեզարդվել է եկեղեցին իր ողջ բովանդակությամբ՝ իր դռները բացելով հավատավորի հոգու առջև: Սրբազան Հայրը նաև շնորհակալություն հայտնեց տիկին Ժաննային, ով Սբ. Խաչն ընծայաբերել էր Զորավոր Սբ. Աստվածածին եկեղեցուն իր թոռնիկի անունից: «Պսակադրության արարողության համար օծված Սբ. Խաչը՝ Երուսաղեմից բերված ձիթենյաց մասունքը կրող, առավել զորավոր է, քանի որ Տիրոջ հետքերով է գնացել, և Տիրոջ հոգին այստեղ ներգործուն ձևով ներկա է լինելու մեր աղոթքներում: Սբ. Խաչը քրիստոնեական հավատքի գերագույն խորհրդանիշն է և հավատքի կենդանի աղբյուրը հավատացյալներիս համար: Փրկության գործիքն անընդհատ հիշեցնում է մեզ քրիստոնյա լինելու պատկանելիության մասին: Սբ. Խաչը թող միավորի մեր սիրտն ու միտքը, որպեսզի արժանի լինենք քայլելու Խաչի հետքերով՝ միավորվելու համար Տիրոջ սրտին ու մտքին, մասնակիցը լինելով Գերագույն Սիրո: Իսկ Գերագույն Սերն արտահայտվում է մեկս մյուսին սիրելով, ինչի համար մարմնացավ մեր Տերը՝ Իր Սերը բաշխելով Իր հետևորդներին: Սիրելու գերագույն պատվիրանը Սբ. Խաչի օծման առթիվ ամրագրենք մեր սրտի մատյանում, որպեսզի այն մշտանորոգ կոչնակ դառնա դեպի Տերը առաջնորդվելիս: Մենք անմահության հավատքի հետևորդներն ենք և Սբ. խաչին երկրպագում ենք հարության հավատքով»,- ասաց Սրբազան Հայրը:

Արարողությունից հետո բոլոր ներկաները հաղորդ դարձան Սուրբ Խաչի օրհնությանը:

«Թոռնիկիս՝ վեցամյա Արթուր Բալայանի մեծ ցանկությունն էր խաչ նվիրել Զորավոր Սուրբ Աստվածածին եկեղեցուն: Արդեն երեք տարի է Արթուրը մասնակցում է «Ոտնլվա»-ի արարողությանը, նաև ժամանակ առ ժամանակ շապիկ է հագնում և Սբ. Խորան բարձրանում: Թոռնիկս, լսելով Տիրոջ խոսքը, հավատքի մեջ աճում է կաթիլ առ կաթիլ և կարծում եմ, որ երեխայի հոգևոր դաստիարակության հարցում իրենց կարևոր դերն ունեն տատիկն ու պապիկը»,- ասաց տիկին Ժաննան:

Տեր Գրիգորը նշեց, որ արծաթյա մեծ ձեռաց խաչում ամփոփված է Երուսաղեմի Սբ. Հրեշտակապետաց եկեղեցու բակում գտնվող ձիթենու ծառի փայտից մի կտոր: Ներկայացնելով ձիթենու ծառի հետ կապված ավանդությունը՝ Տեր Հայրն ասաց, որ Հայ Առաքելական Սբ. եկեղեցուն պատկանող սրբավայրի՝ Սուրբ Հրեշտակապետաց եկեղեցու խորանին կից, դրսի կողմից մինչև հիմա կա և պտղաբերում է այն ձիթենին, որից, ըստ ավանդության, կապել են մեր Տեր Հիսուս Քրիստոսին մինչ Աննա քահանայապետի դատը: Ծառը չորացած է եղել և սկսել է պտղաբերել, երբ նրա վրա կաթացել է Քրիստոսի արյունը: Ըստ ավանդության՝ Հիսուսի «Առաջին բանտի» ձիթենու ծառի տերևներով զանազան հիվանդություններ են բժշկվում, իսկ ձիթապտուղներն աղոթքով օգտագործող ամուլ կանայք Աստծո ողորմությամբ և իրենց հավատքով պտղաբերում են: Ապա Տեր Հայրը հավելեց. «Մեր ցանկությունն է, որ նորապսակներն օրհնություն ստանան հրաշագործ ձիթենու մասունքը կրող այս խաչով՝ արժանանալով զավակ ունենալու աստվածային մեծ պարգևին»:

Այսուհետ կյանքի և փրկության միջոց համարվող մասունքակիր մեծ ձեռաց Խաչի օրհնությամբ Զորավոր Սուրբ Աստվածածին եկեղեցում Սբ. Պսակի արարողությամբ կօրհնվի ամուսնացող զույգի սիրո և հավատարմության ուխտը, որ կատարվում է Աստծո և հանրության առջև:

Կարինե Սուգիկյան