23 Դեկտեմբեր, Բշ
Ապրիլի 23-ին Մայր Աթոռ Սուրբ Էջմիածնում տեղի ունեցաւ Արեւելեան Ուղղափառ Եկեղեցիների Հովուապետերի` Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի, Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսի, Ալեքսանդրիայի Պապ եւ Համայն Աֆրիկայի Պատրիարք Նորին Սրբութիւն Թաւադրոս Բ-ի, Ասորի Ուղղափառ Եկեղեցու եւ Համայն Արեւելքի Պատրիարք Նորին Սրբութիւն Մօրան Մօր Եփրեմ Բ-ի եւ Մալանկարայ Ուղղափառ Եկեղեցու պետ եւ Մալանկարայի Մետրօպոլիտ Նորին Սրբութիւն Բասելիոս Մար Թոմայ Պաուլոս Բ-ի հանդիպումը:
Զրոյցի ընթացքում Գարեգին Բ Ամենայն Հայոց Կաթողիկոսը ուրախութիւն յայտնեց Արեւելեան Ուղղափառ Եկեղեցիների հոգեւոր պետերի այս հանդիպման կապակցութեամբ` ընդգծելով, որ 1965 թ. Ադիս Աբեբայի հանդիպումից յետոյ նման հնարաւորութիւն չի ընձեռուել: Նորին Սրբութիւնը նաեւ իր շնորհակալական խօսքն ուղղեց վերջիններիս Հայոց Ցեղասպանութեան նահատակների սրբադասման արարողութեան առիթով Հայաստան ժամանելու առիթով:
Իր հերթին Արամ Ա Մեծի Տանն Կիլիկիոյ Կաթողիկոսը, ողջունելով Քոյր Եկեղեցիների առաջնորդներին, ներկայացրեց սրբադասման արարողութեան կարեւոր նշանակութիւնը:
Հանդիպման ընթացքում հովուապետերը քննարկեցին Արեւելեան Ուղղափառ Քոյր Եկեղեցիների ընտանիքին յուզող խնդիրները, անդրադարձ կատարեցին մասնաւորապէս Եկեղեցիների հաւատացեալների առջեւ ծառացած մարտահրաւէրներին: Կարեւոր նկատուեց, որ վերականգնուի Արեւելեան Ուղղափառ Եկեղեցիների պետերի պարբերական հանդիպումների աւանդութիւնը, ինչը կարեւոր խթան կը լինի համագործակցութեան զօրացման համար:
Ղպտի, Ասորի եւ Մալանկարայ Եկեղեցիների առաջնորդները եւս գոհունակութիւն յայտնեցին Հայոց Ցեղասպանութեան նահատակների սրբադասման արարողութեանը ներկայ գտնուելու կապակցութեամբ եւ իրենց հերթին վերահաստատեցին Քոյր Եկեղեցիների հովուապետերի հանդիպումների կարեւորութիւնը:
Զորավոր Սուրբ Աստվածածին եկեղեցի