«Մենք մեր զինվորի կողքին ենք» ծրագիրն իրականացրեց հերթական դրամաբաշխումը

Ն.Ս.Օ.Տ.Տ. Գարեգին Բ Ամենայն Հայոց Հայրապետի օրհնությամբ և Տ. Նավասարդ արքեպիսկոպոս Կճոյանի նախաձեռնությամբ իրականացվող՝ «Մենք մեր զինվորի կողքին ենք» ծրագրի շրջանակներում հոկտեմբերի 29-ին ԱՀԹ Զորավոր Ս.Աստվածածին եկեղեցում դրամական օգնություն բաշխվեց Էրեբունի, Կենտրոն և Մալաթիա Սեբաստիա համայնքների հաշվառված 15 զինհաշմանդամի՝ 8 առաջին, 6 երկրորդ և 1 երրորդ խմբի:

ԱՀԹ Էրեբունի համայնքի հոգևոր հովիվ Տ. Զգոն քահանա Աբրահամյանը միջոցառումը սկսեց Տերունական աղոթքով, ապա կատարեց Բժշկության կարգ: Տեր հայրը ներկաներին փոխանցեց Տ. Նավասարդ Սրբազանի հայրական օրհնությունները: Մինչ դրամաբաշխմանն անցնելը ԱՀԹ բարեգործական ծրագրերի համակարգող Շուշան Պետրոսյանը ներկայացրեց «Մենք մեր զինվորի կողքին ենք» ծրագիրը՝ մանրամասն նշելով, թե ովքեր են ներառված ծրագրում:

Սա «Մենք մեր զինվորի կողքին ենք» բարեգործական երկրորդ ծրագրի թվով տասներորդ դրամաբաշխությունն էր: Ս. Սարգիս զորավորի տոնի առթիվ երկրորդ անգամ հավաքված 50 մլն դրամ գումարը բաշխվում է հայոց բանակում ծառայած զինվորների ընտանիքներին: Այս տարի աջակցություն են ստանում նախորդ տարի ծրագրում չընդգրկված՝ զոհված զինվորների ընտանիքները և զինհաշմանդամները: Ծրագիրն իրականացվում է Արարատյան Հայրապետական թեմի տարածքում՝ Երևանում և Արարատի մարզում: Դրամաբաշխությունը կատարվում է ՀՀ ՊՆ սոցիալական պաշտպանության վարչության տրամադրած ցուցակով:

Արարատյան Հայրապետական թեմի տեղեկատվական բաժին