Ուղի, որ օգնում է վերագտնել ինքդ քեզ

Ժամանակակից աշխարհի տեղեկատվական հեղեղը, սոցիալական ցանցերն ու բազմաթիվ մարտահրավերներ երիտասարդի կյանքը շատ հաճախ լցնում են անհանգստությամբ ու տագնապով՝ հեռվացնելով նրան ինքն իրենից: Տեղեկատվական հորձանուտի մեջ կանգ առնելու, աստվածատուր կյանքը վերարժևորելու և ներքին խաղաղություն ձեռք բերելու լավագույն միջոցներից է հոգևոր ճամփորդությունը՝ ուխտագնացությունը: Հուլիսի 5-ին «Զորավոր» երիտասարդաց միությունը հոգևոր ճամփորդության մեկնեց ՝ նախ Տերունի օրը նշանավորելով Զորավոր Ս. Աստվածածին եկեղեցում Սուրբ Պատարագին մասնակցությամբ: Երիտասարդները, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և միության հոգևոր պատասխանատու Տեր Վահան քահանա Առաքելյանի առաջնորդությամբ, ուխտի մեկնեցին Ակունք գյուղի Ս. Աստվածածին եկեղեցի և Ս.Պողոս-Պետրոս մատուռ-սրբավայր:

Ակունքի Ս. Աստվածածին եկեղեցում երիտասարդ ուխտավորներին դիմավորեց և ողջունեց եկեղեցու հոգևոր հովիվ Տեր Աբգար քահանա Մարգարյանը, մաղթեց, որ Տերն ի կատար ածի իրենց ուխտը և ուխտագնացության կարևորության մասին խոսելով՝ այն նմանեցրեց ծիածանի, որ կամրջում է մարդուն և Աստծուն: Ապա Տեր Հայրը հյուրասիրեց երիտասարդներին քաղցրավենիքով և, իր օրհնությունը տալով նրանց, «Պահպանիչ» աղոթքով արձակեց: Հաջորդ սրբավայրում՝ Ս. Պողոս մատուռում, երիտասարդները, Տեր Վահանի գլխավորությամբ, միասնաբար աղոթք վերառաքեցին առ Տեր՝ Հայոց ազգի, եկեղեցու և  հոգևոր վերելքի համար, «Տեր ողորմեա» շարականը երգեցին, իսկ Ս. Պետրոս մատուռում ուխտավորները ընթերցեցին սբ. Ներսես Շնորհալու «Հավատով խոստովանիմ» աղոթաշարը: Այնուհետև «Զորավոր» երիտասարդաց միությունը համախմբվեց սիրո ճաշի շուրջ, հոգեշահ զրույց ունեցավ և Տեր Վահանը պատասխանեց երիտասարդներին հուզող հարցերին:

Հոգենորոգ ուխտի օրը նպաստեց, որ նույն գաղափարի և նպատակի շուրջ համախմբված երիտասարդների միջև ձևավորվի անկեղծ ու մտերիմ միջավայր, հնարավորություն տվեց երիտասարդներին կանգ առնել արագընթաց աշխարհում, վերագտնել հոգևոր արմատները, կոփել կամքը և կյանքին նայել նոր՝ ավելի լուսավոր ու իմաստավորված հայացքով։ «Զորավոր» երիտասարդաց միությունը Երևան վերադարձավ հոգևոր մեծ լիցքերով, խաղաղությամբ և հոգեշահ գործեր ձեռնարկելու պատրաստակամությամբ։

Կարինե Սուգիկյան